ފުލުހުން ދެނީ ވޭޕް ވިއްކާ އަދި ބޭނުންކުރާ މީހުންނަށް ޤާނޫނީ ފިޔަވަޅު އަޅާނެ ކަމުގެ ޔަގީންކަން
ވޭޕް ވިއްކާ އަދި ބޭނުންކުރާ މީހުންނަށް ޤާނޫނީ ފިޔަވަޅު އަޅަމުން ގެންދާނެ ކަމުގެ ޔަގީންކަން ދިވެހި ފުލުހުންގެ ޚިދުމަތުން ދީފިއެވެ.
އެޔަގީންކަން ދީ ފުލުހުން ޢާއްމުކުރި ބަޔާނެއްގައި ބުނީ ވޭޕް ވިއްކާ އަދި ބޭނުންކުރާ މީހުންނަށް ޤާނޫނީ ފިޔަވަޅު އަޅަމުން ގެންދާނެ ކަމަށެވެ. ޖޫރިމަނާ ކުރެވޭ ފަރާތްތަކަށް އެކަން އަންގާނީ މޯބައިލް ފޯނުގެ ޒަރިއްޔާއިން ފޮނުވާ މެސެޖެއް މެދުވެރިކޮށް ކަމަށް ފުލުހުން ބުންޏެވެ. އެއިދާރާއިން ބުނީ މެސެޖްގައި ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ހިމަނާފައިވާނެ ކަމަށެވެ.
ފުލުހުންގެ ބަޔާނުގައި ބުނީ ދުންފަތް ކޮންޓްރޯލް ކުރުމާ ބެހޭ ޤަނޫނާއި އެއްގޮތްވާ ގޮތުގެ މަތިން އިލެކްޓްރޯނިކް ސިނގިރޭޓް ނުވަތަ ވޭޕްކުރުމަށް ބޭނުންކުރާ އާލާތްތައް ވިއްކުމާއި ހިލޭ ދިނުމާއި ބެހުމާއި އަދި އެކަކު އަނެއްކަކަށް ދޭ ފަރާތްތަކާމެދު ދިވެހިން ފުލުހުންގެ ޚިދުމަތުން ޤާނޫނީ ފިޔަވަޅު އަޅާ ޖޫރިމަނާކުރުމުގެ މަސައްކަތް ކުރަމުން ގެންދާނެ ކަމަށެވެ.
މީގެ އިތުރުން މިފަދަ އާލާތްތައް ބެނުންކުރާ ފަރާތްތަކާ ދެކޮޅަށްވެސް އެފަދައިން ޤާނޫނީ ފިޔަވަޅު އަޅަމުން ގެންދާނެކަމަށް ފުލުހުން ބުންޏެވެ. އެހެންކަމުން ދުންފަތް ކޮންޓްރޯލްކުރުމާބެހޭ ޤާނޫނަށް ގެނައި އިސްލާހަށް ހުރިހާ ފަރާތްތަކުންވެސް ފުރިހަމައަށް އަމަލުކުރުމަށާއި ޤަނޫނު ތަންފީޒްކުރުމުގައި ފުރިހަމަ އެއްބާރުލުން ދިނުމަށް ފުލުހުން ވަނީ އިލްތިމާސްކޮށްފައެވެ.
ވޭޕް އެތެރެކުރުން މަނާކުރީ މިމަހުގެ ފުރަތަމަ ދުވަހުން ފެށިގެންނެވެ. އަދި މިމަހުގެ 15 ވަނަ ދުވަހުން ފެށިގެން ވޭޕް ބޭނުން ކުރުންވެސް މަނަލެވެ. ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވީ ވޭޕް މަނާކުރީ ރައްޔިތުން އެދިގެން ގައުމުގެ މުސްތަގުބަލަށްޓަކައި ކަމަށެވެ.
ރިއެކްޝަންސް
