ދުންފަތާ ދުރަށްދާން ބޭނުންވާ މީހުންނަށް އެހީތެރިވުމަށް ސައުވީސް ގަޑިއިރު ގުޅޭ ނަމްބަރު 1676 ތަޢާރަފްކޮށްފި
ދުންފަތުން ދުރުވުމުގެ ފަރުވާއަށް އާސަންދަ ލިބޭނެ
ދުންފަތާ ދުރަށްދާން ބޭނުންވާ މީހުންނަށް އެހީތެރިވުމަށް ސައުވީސް ގަޑިއިރު ގުޅޭ ނަމްބަރު 1676 ތަޢާރަފްކޮށްފިއެވެ. ހެލްތް މިނިސްޓްރީގައި މިއަދު ނޫސްވެރިންނަށް މައުލޫމާތު ދެއްވަމުން މިނިސްޓަރ އަބްދުالله ނާޒިމް އިބްރާހީމް ވިދާޅުވީ ދުންފަތް ކޮންޓްރޯލް ކުރުމާބެހޭ ޤާނޫނަށް ގެނައި މުހިއްމު ބަދަލުތަކާއެކު ދުންފަތުން ދުރަށްދާން ބޭނުންވާ މީހުންނަށް އެހީތެރިވުމަށް މުހިއްމު މަސައްކަތްތަކެއް ފެށިފައިވާ ކަމަށެވެ.
ދުންފަތުގެ އިސްތިއުމާލު ކުރުމަށް އާދަވެފައިވާ ފަރާތްތަކަށް އެކަން ހުއްޓާލުމަށް ބޭނުންވާ އެހީތެރިކަން މުޅިރާއްޖޭގައި ލިބޭނެހެން ސިޒޭޝަންގެ ޚިދުމަތް ގާއިމް ކުރުމަށް ރައީސުލްޖުމްހޫރިއްޔާ ނިންމަވާފައިވާކަން ފާހަގަކުރައްވާ ވަޒީރު ވިދާޅުވީ އެ ޚިދުމަތް ދިނުމަށް ބޭނުންވާ މީހުން ތަމްރީނުކުރުމުގެ މަސައްކަތް މިހާރުވެސް ވަރަށްބާރަށް ކުރިއަށް ގެންދެވިފައިވާ ކަމަށެވެ. އަދި އިތުރަށް އެ މަސައްކަތް ކުރިއަށް ގެންދިއުމަށް ރޭވިފައިވާ ކަމަށް ވިދާޅުވިއެވެ.
ދުންފަތުން ދުރަށްދާން ބޭނުންވާ މީހުންނަށް އެ ކަމަށް ބޭނުންވާ ނިކޮޓިންގ ޕެޗް, ގަން އަދި އެހެނިހެން ފަރުވާވެސް އާސަންދައިން ކަށަވަރުކުރާނެ ގޮތް ސަރުކާރުން ނިންމަވާފައިވާ ކަމަށް މިނިސްޓަރ ނާޒިމް ވިދާޅުވިއެވެ. ސިޒޭޝަންގެ ޚިދުމަތް ފަސޭހައިން ލިބޭނެގޮތް ހެދުމަށްޓަކައި މިނިސްޓްރީން އެޅުއްވި އެންމެ މުހިއްމު އެއް ފިޔަވަޅަކީ އެކަމަށް އެދޭ ފަރާތްތަކަށް ޚާއްޞަ ކްއިޓް ލައިނެއް ގާއިމް ކުރުމެވެ. އަދި 24 ގަޑިއިރު ޚިދުމަތް ލިބޭނެ ގޮތަށް އެ ކްއިޓް ލައިން ޤާއިމް ކުރެއްވުމެވެ. މިނިސްޓަރ ނާޒިމް ވިދާޅުވީ އަންނަ އާދިއްތަ ދުވަހުން ފެށިގެން ކްއިކް ލައިނުގެ ޚިދުމަތް އެޗްޕިއޭ މެދުވެރިކޮށް ލިބޭނެ ކަމަށެވެ. އޭގެ އިތުރުން ދިގު މުއްތަށް ވިސްނައިގެން ޕްލޭނެއް އެކުލަވާލުމުގެ މަސައްކަތް ކުރައްވަމުން ގެންދަވާ ކަމަށް ވަޒީރު ވިދާޅުވިއެވެ.
" ދުންފަތް ކޮންޓްރޯލް ކުރުމަށް ރާއްޖޭގައި ކުރަންޖެހޭ އެންމެހާ މަސައްކަތްތައް ރޭވުންތެރިކަމާއި, އަދި ނަތީޖާ ލިބޭނެ އަދި ދެމެހެއްޓެނިވި ގޮތެއްގައި ކުރިއަށް ގެންދިއުމަށް ރައީސުލްޖުމްހޫރިއްޔާގެ ނިންމެވުމަކުން ފަސް އަހަރު ދުވަހުގެ ޕްލޭނެއް އެކުލަވާލުމުގެ މަސައްކަތް ޑަބްލިޔު.އެޗް.އޯގެ އެހީތެރިކަމާއެކު މިހާރު ވަނީ ފެށިފަ. ޕްލޭން އެކުލަވާލުމުގައި ކަމާގުޅުންހުރި ބޭފުޅުންގެ އިތުރުން ރައްޔިތުންގެ ހިޔާލާ މަޝްވަރާ ހޯދާނެ." މިނިސްޓަރ ނާޒިމް ވިދާޅުވިއެވެ.
މީގެއިތުރުން މިނިސްޓަރ ވިދާޅުވީ ދުންފަތް ކޮންޓްރޯލް ކުރުމަށް ރަށު ފެންވަރުގައާއި އަތޮޅު ފެންވަރުގައި ކައުންސިލްތަކުން ކުރާ މަސައްކަތްތަކަށް ސަރުކާރުން އެހީތެރިވަމުން ގެންދާނެ ކަމަށެވެ. އެގޮތުން އެންމެ ރަނގަޅު މަސައްކަތްތަކެއް ކުރާ ކައުންސިލް ތަކަކަށް އެއިދާރާއިން ހިންގާ ތަރައްޤީގެ މަޝްރޫއުތަކަށް ސަރުކާރުން ޚާއްޞަ އެހީތެރިކަން ފޯރުކޮށްދިނުމުގެ ނިޒާމް ދުންފަތް ކޮންޓްރޯލްކުރުމާބެހޭ ދުރުރާސްތާގެ ޕްލޭން އެކުލެވިގެންދާއިރު ފަހިކޮށްދެއްވާނެ ކަމަށް ވިދާޅުވިއެވެ.
ވަޒީރު ވިދާޅުވީ އީ ސިގިރޭޓްވެސް މަނާކޮށް, ދުންފަތް ކޮންޓްރޯލް ކުރުމާބެހޭ ޤާނޫނަށް ބަދަލުތަކެއް ގެނައީ އެތައްސަތޭކަ ބެލެނިވެރިންނާއި ސިއްހީ އިދާރާތަކުންނާއި, ސިއްހީ ދާއިރާގެ ބޭފުޅުން ގޮވާލި ގޮވާލުމަށް އިޖާބަދީ އަދާއި މާދަމާގެ ޖީލު ދުންފަތުން ސަލާމަތް ކުރުމަށް ކަމަށެވެ. ޤާނޫނަސް ގެނައި ބަދަލާއެކު އީ ސިގިރޭޓާއި, އޭގެ ބައިތައް އެތެރެކުރުން މިހާރު މަނާވާނެއެވެ. މިމަހުގެ 15 އިން ފެށިގެން ބޭނުންކުރުންވެސް މަނަވާނެއެވެ. ދުންފަތުގެ އަގުވެސް ޤާނޫނަށް ގެނައި ބަދަލާއެކު ވަނީ ބޮޑުކޮށްފައެވެ.
ރިއެކްޝަންސް
