މަސްތުވާތަކެއްޗާބެހޭ ގާނޫނަށް ގެންނަ އިސްލާހަކީ ޒުވާނުން އަނބުރާ މުޖުތަމައަށް ގެނައުމުގެ ފެށުން: މެންބަރު އިއްބެ

މަސްތުވާތަކެއްޗަށް ސަރުކާރުން ގެންނަން ހުށަހަޅާފައިވާ އިސްލާހަކީ މަސްތުވާތަކެތީގެ ވަބާގައި ޖެހިފައިތިބި ޒުވާނުން އަނބުރާ ހެޔޮގޮތުގައި މުޖުތަމައަށް ގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރައްވަމުން އަންނަ މަސައްކަތުގެ ފެށުން ކަމުގައި ފުވައްމުލަކު ދެކުނު ދާއިރާގެ ޕީ.އެން.ސީގެ މެންބަރު އިބްރާހީމް ހުސައިން ވިދާޅުވެއްޖެއެވެ.

ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ މަސްތުވާތަކެއްޗާބެހޭ ގާނޫނަށް އިސްލާހު ގެނައުމުގެ ބިލުގެ ބަހުސްގައި ވާހަކަ ދައްކަވަމުން މެންބަރު އިބްރާހީމް ހުސައިން ވިދާޅުވީ ރާއްޖޭގައި މަސްތުވާތަކެތީގެ މައްސަލަ މިހާ ބޮޑުވެގެން ދިޔައީ ވޭތުވެދިޔަ ސަރުކާރުތަކުންނާއި ދައުލަތުގެ ކަމާ ގުޅުންހުރި އިދާރާތަކުން އަދާ ކުރަންޖެހޭ ޒިންމާ އެންމެ ފުރިހަމަ ގޮތުގައި އަދާ ކޮށްފައި ނުވުމުގެ ސަބަބުން ކަމަށެވެ.

މެންބަރު ވިދާޅުވީ މަސްތުވާތަކެތީގެ މައްސަލައަށް ހައްލު ހޯދަން މިހާރުވެސް މާބޮޑަށް ލަސްވެއްޖެ ކަމަށާއި މަސްތުވާތަކެތީގައި ޖެހި ހަލާކުވެ ނިމިދާކަށް އެއްވެސް ޒުވާނަކު ބޭނުން ނުވާނެ ކަމަށެވެ.

އިއްބެ ވިދާޅުވީ މިހާތަނަށް ފެނިފައިވަނީ ގާނޫނެއްގެ ނަމުގައި ގާނޫނެއް ހަދާފައިވާތަން ކަމަށާއި އޭގެ ބޭނުމާއި ފައިދާ ރައްޔިތުންނަށް ލިބެމުން ގޮސްފައި ނުވާ ކަމަށެވެ.

އޭނާ ވިދާޅުވީ ސަރުކާރުން މިހާރު ހުށަހަޅާފައިވާ ބިލުގައި އެ ގާނޫނަށް 89 އިސްލާހު ހުށަހަޅާފައިވާ ކަމަށާއި މި އިސްލާހުތަކާއެކު ބިލު ގާނޫނަކަށް ބަދަލުވުމުން މަސްތުވާތަކެތީގެ ވަބާގައި ޖެހިފައިތިބި ގިނަ ބަޔަކަށް ގާނޫނުގެ ތެރެއިން ފަރުވާ ލިބިގެންދާނެ ކަމަށެވެ.

"މިއީ އަޅުގަނޑުމެން މިދަންނަވާ ހެޔޮ ވެރިކަމަކީ. މިއީ އަޅުގަނޑުމެން މިދަންނަވާ ޒުވާނުން މުޖުތަމައަށް އަނބުރާ ގެނެސްދިނުމަށްޓަކައި ކުރާ މަސައްކަތުގެ ފެށުމޭ އަޅުގަނޑު ދަންނަވާނީ" ފުވައްމުލަކު ދެކުނުދާއިރާގެ މެންބަރު އިބްރާހީމް ހުސައިން ވިދާޅުވިއެވެ.

އޭނާ ވިދާޅުވީ ނިމިދިޔަ ސަރުކާރު ތަކުން މިކަމަށް އަޅާނުލާ ދޫކޮށްލާފައި އޮތީ ސިޔާސީ ބޭނުމެއްގައި ކަމަށެވެ.

މަސްތުވާތަކެއްޗާބެހޭ ގާނޫނަށް އިސްލާހު ގެނައުމުގެ ބިލަށް ވާހަކަ ދައްކަވަމުން ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިން ވިދާޅުވީ ފުވައްމުލަކަކީވެސް މަސްތުވާތަކެތީގެ ވަބާގައި ޖެހިފައިވާ ޒުވާނުން އެންމެ ގިނައިން ތިބި އެއްރަށް ކަމަށާއި އެކުދިންނަށް އަޅާލާ އެއީ މުޖުތަމައަށް ބޭނުންތެރި ކުދިންނަށް ހެދުމަށް މަސައްކަތް ކުރަންޖެހޭ ކަމަށް މެންބަރު ވިދާޅުވިއެވެ.

އޭނާ ވިދާޅުވީ ގާނޫނަށް ގެންނަ އިސްލާހުތަކާއެކު ކޯޓުތަކުންވެސް އަދުލުވެރިކަމާއި އިންސާފުވެރިކަމާއެކު މިފަދަ ގާނޫނުގެ ބޭނުން ހެޔޮގުތުގައި ހިފަންޖެހޭ ކަމަށެވެ.