ގެސްޓްހައުސް ހިންގަން ހައްޖު ކޯޕަރޭޝަނުން މަސައްކަތްކުރުމަކީ އެންމެ ފައިދާހުރި ގޮތްތޯ ވިސްނާލަން ޖެހޭ- މިނިސްޓަރ ޒަމީރު
ގެސްޓްހައުސް ހިންގަން ހައްޖު ކޯޕަރޭޝަނުން މަސައްކަތްކުރުމަކީ އެންމެ ފައިދާހުރި ގޮތްތޯ ވިސްނާލަން ޖެހޭ ކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެ އެވެ. ވަޒީރު މިފަދައިން ވިދާޅުވީ މިއަދު ރައްޔިތުންގެ މަޖިލިހުގައި ހައްޖު ކޯޕަރޭޝަނުން ގެސްޓްހައުސް ހިންގަން ފެށުމުން ދެންވާނީ ކިހިނެއްތޯ ވެލިދޫ ދާއިރާގެ މެމްބަރު މުޙައްމަދު އައްބާސް ކުރެއްވި ސުވާލަށް ޖަވާބުދެއްވަމުންނެވެ.
އެސުވާލަށް ޖަވާބުދެއްވަމުން ވަޒީރު މޫސާ ޒަމީރު ވިދާޅުވީ ހައްޖު ކޯޕަރޭޝަނާ ހަވާލުވަނީ ފަންޑެއް ލިބުނީމަ އެފަންޑެއް މެނޭޖްކުރަން ކަމަށެވެ. އެފަންޑުން ނަގައިގެން މީހުން ހައްޖަށް ފޮނުވުމަކީ އެކޯޕަރޭޝަންގެ ޒިންމާ ކަން ފާހަގަކުރައްވާ ވަޒީރު ވިދޅުވީ ވއެހެންވީމަ ގެސްޓްހައުސް ހިންގަން ހައްޖު ކޯޕަރޭޝަނުން މަސައްކަތްކުރުން އޭގެ ޒާތުގައި އެންމެ ފައިދާހުރި ގޮތްތޯ ކުންފުނީގެ ބޯޑުންނާ އަދި ކުންފުނީގެ ހިއްސާދާރުން ވިސްނާލަން ޖެހޭ ކަމަށެވެ.
" އެއީ ޢާއްމުގޮތެއްގައި ފަންޑް ހުރެއްޖެނަމަ އެކަމުގެ ސްޕެޝަލިސްޓުންނާ ހަވާލުކޮށްގެން ފަންޑް މެނޭޖްކޮށްގެން އޭގެފައިދާ ކުންފުންޏަށް ހޯދައިފިކަމަށް ވެއްޖިއްޔާ އޭގެނަތީޖާ ރަނގަޅުވާނެކަމަށް މިފެންނަނީ." ވަޒީރު ވިދާޅުވިއެވެ.
މިނިސްޓަރ ޒަމީރު ވިދާޅުވީ ޓޫރިޒަމަށް އިންވެސްޓްކުރާނަމަ ޓޫރިޒަމަށް އިންވެސްޓްކުރެވޭނެ ކުންފުނި ތައް ސަރުކާރުގެ ތެރޭގައި އެބަހުރި ކަމަށެވެ. ހުރިހާ ކުންފުނިތަކެއް ގެސްޓްހައުސްއާ ރިސޯރޓް ހެދީމަ އޭގެ ނަތީޖާ ރަނގަޅު ނުވާނެކަމަށް ނުފެންނަ ކަމަށް ވަޒީރު ވިދާޅުވިއެވެ. ވިދާޅުވީ އެއީ ޕޮލިސީ ލެވެލްއެއްގައި ވިސްނަން ޖެހޭ ކަމެއް ކަމަށެވެ.
ހައްޖު ކޯޕަރޭޝަނުން ވަނީ ގެސްޓްހައުސް ވިޔަފާރީގެ ތެރެއަށް ވަންނަން ނިންމެވިކަން އިއުލާނުކޮށްފައެވެ.
ރިއެކްޝަންސް
