ސްޓެލްކޯއިން އެމްއެންޑީއެފް އަށް ޑީޕް ޓްރެކަރއަކާއި ޑްރޯނެއް ހަދިޔާކޮށްފި
ސްޓެލްކޯއިން އެމްއެންޑީއެފް އަށް ޑީޕް ޓްރެކަރއަކާއި ޑްރޯނެއް ހަދިޔާކޮށްފިއެވެ. ޑީޕް ޓްރެކަރ އަކީ ކަނޑުއަޑީގެ ސާޗް އެންޑް ރެސްކިޔުގައި ބޭނުންކުރާ ވަސީލަތެކެވެ. އަދި ޑްރޯން އަކީ އުސްއިމާރާތްތަކުގެ އަލިފާން ނިންވުމުގައި އެހީތެރިވެދިނުމަށް، ފެންޖެހުމަށް ބޭނުންކުރާ ޑްރޯނެކެވެ.
އެ ވަސީލަތްތައް ސްޓެލްކޯގެ ފަރާތުން އެމްއެންޑީއެފްއަށް ހަވާލުކޮށްދެއްވީ އެ ކުންފުނީގެ މެނޭޖިންގ ޑައިރެކްޓަރ، ޙުސައިން ފަޙުމީއެވެ. އަދި އެމްއެންޑީއެފްގެ ފަރާތުން އެ ވަސީލަތްތަކާ ހަވާލުވެ ވަޑައިގެންނެވީ، ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ.
ސްޓެލްކޯއިން އެމްއެންޑީއެފްއަށް ހަދިޔާކުރި އަލިފާން ނިއްވުމަށް ބޭނުން ކުރެވޭ ޑްރޯން އަކީ ފެން ހޮޅިއާއެކު 200 މީޓަރު އުހަށް ދަތުރު ކުރުމުގެ ގާބިލްކަން ލިބިފައިވާ ޑްރޯން އެކެވެ. އަދި ޑީޕް ޓެރެކާ އަކީ 200 މީޓަރު އަޑިއަށް ދަތުރުކޮށް ރޮބްޓިކް އާރމްއެއްގެ އެހީއާއެކު ކަނޑު އަޑިން ތަކެތި ނެގުމުގެ ގާބިލްކަން ލިބިފައިވާ ވަސީލަތެއް ކަމަށް ސްޓެލްކޯއިން ބުންޏެވެ.
މި ވަސީލަތްތައް ހަދިޔާކުރެއްވުމަށް ބޭއްވި ރަސްމިއްޔާތުގައި ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަޙްމަދު ޣިޔާޘްއާއި، އެމްއެންޑީއެފްގެ ޖެނެރަލް އޮފިސަރުންނާއި، ސްޓެލްކޯގެ އިސްވެރިން ބައިވެރިވެ ވަޑައިގެންނެވިއެވެ.
އިޖުތިމާއީ ޒިންމާގެ ދަށުން ސްޓެލްކޯއިން ދަނީ މިފަދަ އެހީތެރިކަން ފޯރުކޮށްދެމުންނެވެ. އެގޮތުން އިސްލާމީ މަރުކަޒުގެ މުންނާރު ތިރީގައިވާ މަސްފެންގަނޑުވެސް ދާދިފަހުން މަރާމާތުކޮށްދިނީ ސްޓެލްކޯއިންނެވެ.
ރިއެކްޝަންސް
