މަސްދޯނި ތަކުގައި ގަވާއިދާ ހިލާފަށް މަސްވެރިކަން ކުރަމުންދިޔަ 39 މީހަކު އިމިގްރޭޝަންގެ ބެލުމުގެ ދަށަށް
މަސްދޯނި ތަކުގައި ގަވާއިދާ ހިލާފަށް މަސްވެރިކަން ކުރަމުންދިޔަ 39 މީހަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން އެއިދާރާގެ ބެލުމުގެ ދަށަށް ގެންދިޔައީ މަސްމާރުކޭޓް ސަރަހައްދުގައި ހިންގި އޮޕަރޭޝަންގައި އެސަރަހައްދުގައި އަޅާފައި ހުރި މަސްދޯނިތަކުން ފާހަގަކުރެވުނު ގަވާއިދާ ހިލާފަށް އުޅޭ ބިދޭސީންނެވެ. އިމިގްރޭޝަނުން ބުނީ އެސަރަހައްދުގައި އަޅާފައިވާ މަސްބޯޓްތައް ބަލާފާސްކޮށް 39 މީހުން ބެލުމުގެ ދަށަށް ގެންދިޔަ ކަމަށެވެ. މިއީ އިމިގްރޭޝަނުން ސީދާ މަސްދޯނިތަކަށް ޚާއްޞަކޮށް ކުރިއަށް ގެންދިޔަ އޮޕަރޭޝަނެކެވެ.
ގަވާއިދާ ހިލާފަށް އުޅޭ ބިދޭސީން ހޯދުމަށް ފެށި އޮޕަރޭޝަން އިމިގްރޭޝަނުން ވަނީ ފުޅާކޮށްފައެވެ. އެއޮޕަރޭޝަންގައި ފުލުހުންނާއި ގުޅުންހުރި އެހެން އިދާރާތަކުންވެސް ބައިވެރި ވެއެވެ. އެގޮތުން ކެފޭ, ރެސްޓޯރަންޓް, ސެލޫން, އަދި މާރުކޭޓް ސަރަހައްދުންވެސް މިހާތަނަށް ވަނީ ގަވާއިދާ ހިލާފަށް އުޅެމުންދިޔަ ގިނަ އަދަދެއްގެ ބިދޭސީން އަތުލައިގެންފައެވެ.
މިސަރުކާރުން މިހާތަނަށް އެފަދަ 5000 އަށްވުރެ ބިދޭސީން ޑީޕޯރޓް ކޮށްލާފައިވާ ކަމަށް ވަނީ ބުނެފައެވެ. ތިން އަހަރުގެ ތެރޭގައި މުޅި މައްސަލައަށް ހައްލު ގެނައުމަކީ އިމިގްރޭޝަންގެ އަމާޒެވެ.
ރިއެކްޝަންސް
