ބަޖެޓް އަނބުރާ ފޮނުވާލަން ޝިޔާމް ގޮވާލައްވައިފި
އަންނަ އަހަރަށް ލަފާކޮށް, ސަރުކާރުން ހުށަހެޅި ދައުލަތުގެ ބަޖެޓް އަނބުރާ ފޮނުވާލަން މީދޫ ދާއިރާގެ މެމްބަރު އަހުމަދު ޝިޔާމް މުޙައްމަދު ގޮވާލައްވައިފި އެވެ.
އެމްޑިއޭގެ ލީޑަރު އަދި ވިޔަފާރިވެރިޔާ ޝިޔާމް ބަޖެޓް އަނބުރާ ފޮނުވާލަން ގޮވާލެއްވީ އެބަޖެޓުން ވާނުވާ ނޭންގޭ ކަމަށް ވިދާޅުވެއެވެ. ރިޔާސީ އިންތިޚާބުގެ ދެވަނަ ބުރުގައި ޑރ.މުހައްމަދު މުއިއްޒުއަށް ތާއީދުކުރެއްވި ޝިޔާމް މިއަދު މަޖިލިހުގެ ތަޅުމުގައި ވިދާޅުވީ އޭނާ މަޖިލިހުގައި ހޭދަކުރެއްވި 21 އަހަރުގެ ދިގު ތާރީޚުގައިވެސް ތަފްސީލް ނެތް ހަމައެކަނި ބަޖެޓަކީ މިބަޖެޓް ކަމަށެވެ.
މިސަރުކާރުން ހުށަހެޅި ފުރަތަމަ ބަޖެޓާ ގުޅޭގޮތުން ޝިޔާމް ވިދާޅުވީ ރަށްރަށުގެ ތަރައްޤީގެ ވާހަކަތައް ބަޖެޓްގައި ނެތުމުން ކަންބޮޑުވާ ކަމަށެވެ. ފިނޭންސް މިނިސްޓަރ މޫސާ ޒަމީރު ވިދާޅުވެފައި ވަނޯ ބަޖެޓްގައި ތަފްސީލް ނެތަސް ހުރިހާ ރަށެއްގައިވެސް ޕްރިޖެކްޓްތައް ހިންގާނެ ކަމަށެވެ.
ޝިޔާމް ވިދާޅުވީ ވަކިވި ދާއިރާތަކަށް އަދަދުތައް ޖަހާފައި ހުރި ނަމަވެސް އެޚަރަދު ކުރަނީ އެދާއިރާގެ ކޮންކަމަކަށް ކަން ބަޖެޓުން އިނގެން ނެތްކަމަށެވެ. އެގޮތުން ތައުލީމަށްވެސް ޚަރަދު ކުރަނީ ކޮންކޮން ކަމަކަށްކަން ބަޖެޓުން އިނގެން ނެތްކަމަށް ވިދާޅުވިއެވެ. އޭނާ ވިދާޅުވީ ބަޖެޓުން ކުރާ ކަންކަން އިނގެން ރައްޔިތުން ބޭނުންވާ ކަމަށެވެ.
"މީކީ ދުނިޔޭގެ އެއްވެސް ގައުމަކުން ބަޖެޓް ހުށަހަޅާގޮތެއް ނޫން" ޝިޔާމް ވިދާޅުވިއެވެ.
ބަޖެޓްގެ ކަންބޮޑުވުން އިދިކޮޅު ފަރާތްތަކުން ދަނީ ފާޅުކުރައްވަމުންނެވެ. އެމްޑީއޭގެ ލީޑަރުގެ އިތުރުން އެޕާޓީގެ ޑެޕިއުޓީ ލީޑަރު, ވެލިދޫ ދާއިރާގެ މުޙައްމަދު އައްބާސްވެސް ވަނީ ބަޖެޓްގެ ކަންބޮޑުވުން ފާޅުކުރައްވާފައެވެ. ނަމަވެސް ސަރުކާރަށް ތާއީދުކުރައްވާ މެމްބަރުން ގެންދަވަނީ ބަޖެޓް ދިފާއުކުރައްވަމުންނެވެ.
ރިއެކްޝަންސް
