އަންނަ އަހަރު ގުޅިފަޅު ހިއްކާ ނިންމާނަން- ރައީސް
އަންނަ އަހަރު ގުޅިފަޅު ހިއްކާ ނިންމަވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާލުވެއްޖެއެވެ. ރައީސުލްޖުމްހޫރިއްޔާ އެޔަގީންކަން ދެއްވީ ސަރުކާރަށް އެއް އަހަރު ފުރުން ފާހަގަކުރުމަށް ބޭއްވި ޖަލްސާގައި މާލެ ސަރަހައްދުން ހިއްކަމުންދާ ބިންތަކުގެ ތަފްސީލްތައް ހިއްސާ ކުރައްވަމުންނެވެ.
ރައީސުލްޖުމްހޫރިއްޔާ ވިދާޅުވީ ގުޅިފަޅު ހިއްކަން ފަށާފައި އޮތީ 44 ޕަސެންޓް މަސައްކަތް ނިންމާފައި ކަމަށެވެ. މިސަރުކާރުން މިހާރު އެބައި އެއްކޮށް ހިއްކާ ނިންމާފައިވާކަން ފާހަގަކުރައްވާ ވިދާޅުވީ މުޅި ޕްރޮޖެކްޓްގައި އިތުރަށް ހިއްކަން ބުނި ބައި ވަރަށް އަވަހަށް ބަޔަކާ ހަވާލުކުރައްވާނެ ކަމަށެވެ.
" އެއީ އެންމެ ފުން ސަރަޙައްދު، އެތަންވެސް އިރާދަކުރެއްވިއްޔާ ވަރަށް އަވަހަށް ހިއްކަން ބަޔަކާ ހަވާލުކުރާނަން. އެތަން ނުލާ ބަލައިފިއްޔާ އެއްކޮށް ހިއްކާ ނިމިއްޖެ، އެތަން ލައިގެން ގާތްގަނޑަކަށް 70 ޕަސެންޓް އެއޮތީ ހިއްކިފަ. މިއަންނަ އަހަރުތެރޭގަ އިރާދަކުރެއްވިއްޔާ މުޅި ގުޅީފަޅު ހިއްކާ ނިންމަދޭނަން." ރައީސް ވިދާޅުވިއެވެ.
ފޭސް 3 ނުވަތަ ހުޅުމާލޭ ފަޅުތެރެއިން، ނުހިއްކާ އޮތްތަނުން މިދިޔަ ސަރުކާރުން ގޯތި ދީފައިވާކަން ފާހަގަކުރައްވާ ވިދާޅުވީ އެތަނުން ހިއްކާފައި އޮތީ އެންމެ 17 ޕަސަންޓް ކަމަށެވެ. އެކަމަކު މިހާރު އެތަނުގެ 38 ޕަސެންޓް ހިއްކާ ނިމިއްޖެކަމަށް ވިދާޅުވިއެވެ. ރައީސް ވިދާޅުވީ އިރާދަކުރެއްވިއްޔާ އެންމެ ލަސްވެގެން ކުރިޔަށް އޮތް ހައެއްކަ މަސްދުވަހުގެ ތެރޭގައި އެތަން ހިއްކާ ނިންމާނެކަމަށެވެ. މި ސަރުކާރު ހަވާލުވިއިރު ގިރާވަރު ފަޅުގައި ހިއްކާފައި އޮތީ 19 ޕަސެންޓް ކަމަށާއި މިހާރު 33 ޕަސެންޓް ހިއްކިފައިވާކަމަށްވެސް ރައީސް ވިދާޅުވިއެވެ.
އެ މަނިކުފާނު ވަނީ އެ މަޝްރޫޢުގެ މަސައްކަތް ހަވާލުކުރުމުގައި ޤަވާޢިދާ ޚިލާފަށް އެއްވެސް އިންސާފެއް ނެތް ގޮތަށް، ބޭރުގެ ފަރާތަކަށް ވަރަށް ބައިވަރު ބިންތައް ލިބޭގޮތަށް ހަދާފައިވާ ކަމަށް ވިދާޅުވެފައެވެ. އެކަންކޮށްފައި ވަނީ ލޮޕްސައިޑެޑް އެގްރީމަންޓެއްގެ ތެރެއިން ކަމަށާއި އެ އެގްރީމަންޓުން ނިކުމެ، އެތަން ރައްޔިތުންނަށް އެންމެ ފައިދާވާނެ ގޮތަށް، އެންމެ ކުޑަ ޚަރަދަކުން އެތަން ހިއްކާ ނިންމަން ސަރުކާރުން މަސައްކަތް ކުރައްވަމުންދާ ކަމަށްވެސް ވިދާޅުވިއެވެ.
ބޯހިޔާވަހިކަމުގެ ވައުދަކީ މިސަރުކާރުގެ އެންމެ ބޮޑު ވައުދެވެ. މިފަސް އަހަރު ނިމޭއިރު ބޯހިޔާވަހިކަން ބޭނުންވެ, ނުލިބޭ އެއްވެސް މީހަކު ނުހުންނާނެކަމަށް ރައީސް މުއިއްޒު ގެންދަވަނީ ތަކުރާރުކޮށް ވިދާޅުވަމުންނެވެ.
ރިއެކްޝަންސް
