ހިޔާ ޓަވަރުގައި މީހަކު ރަހީނުކުރި މައްސަލައަކީ މަސްތުވާތަކެއްޗާ ގުޅުން އޮތް މައްސަލައެއް- ފުލުހުން
ހިޔާ ޓަވަރުގައި މީހަކު ރަހީނުކުރި މައްސަލައަކީ މަސްތުވާތަކެއްޗާ ގުޅުން އޮތް މައްސަލައެއް ކަމަށް ފުލުހުން ބުނެފިއެވެ. ދިވެހި ފުލުހުންގެ ޚިދުމަތުން ތަހުގީގުކުރަމުންދާ މައްސަލަތަކުގެ ތެރެއިން ބައެއް މައްސަލަތަކުގެ މައުލޫމާތު ހިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ އެމައްސަލައިގައި ވިކްޓިމް އަކަށްވި މީހާއަކީ ރަހީނު ކުރި މީހުންނާ ކުރިން ގުޅުން އޮތް މީހެއް ކަމަށެވެ.
އޭނާ ރަހީނުކޮށް, އިނގިލި ބުރިކުރަން އުޅުނީ މަސްތުވާތަކެތީގެ ވިޔަފާރީގެ ތެރެއިން އުފެދުނު ދެބަސްވުމެއްގެ ތެރެއިން ކަމަށް ފުލުހުން ބުންޏެވެ. ފުލުހުން އެއެޕާރޓްމަންޓްގެ ތަޅު ހަލާކުކޮށްލައިގެން ވަން އިރު ރަހީބުކުރި މީހާ އިނީ ބޯބާލާފައެވެ. އަދި ފުލުހުންނަށް ވަދެވުނީ އެމީހާގެ އިނގިލި ބުރި ކުރަން ތައްޔާރުވަނިކޮށް ކަމަށް ކުރިންވެސް އަދި މިއަދުވެސް ފުލުހުން ބުންޏެވެ.
ފުލުހުން ބުނީ އެމީހާއަށް ނަފްސާނީ ގޮތުންވެސް ވަރަށް ބޮޑަށް އަސަރުކޮށްފައިވާތީ ކައުންސިލިންގވެސް ދީފައިވާ ކަމަށެވެ. މިމަހުގެ 12 ވަނަ ދުވަހުގެ ރޭ ހިނގި އެހާދިސާގައި 12 މީހަކު ފުލުހުން ހައްޔަރުކުރި އެވެ. އެއީ ފުލުހުން އެތަނަށް ވަންއިރު އެތަނުގައި ތިބި މީހުންނެވެ. އޭގެތެރޭގައި އެއެޕާރޓްމަންޓްގެ ވެރިޔާވެސް ހިމެނޭ ކަމަށް ފުލުހުން ބުންޏެވެ. އެމީހާ މަސްތުވާތަކެއްޗަށް ޕޮޒިޓިވް ވެފައިވާ ކަމަށްވެސް ފުލުހުން ބުންޏެވެ. އެއީ ލ.މާވަށް ޖަމީލާ މަންޒިލް އާދަމް ހުސައިން އެވެ. އެއެޕާރޓްމަންޓުން މަސްތުވާތަކެއްޗާއި, ތޫނު އެއްޗިއްސާއި 16700 ރުފިޔާވެސް ފެނުނު ކަމަށް ފުލުހުން ބުންޏެވެ.
މީހާ ރަހީނުކުރީ އެޗް9 ގެ 20 ވަނަ ފަންގިފިލާގެ 11 ވަނަ އެޕާރޓްމަންޓްގައެވެ.
ރިއެކްޝަންސް
