މުދައްރިސުން ތަމްރީނުކުރުމުގެ ޤައުމީ ޕްރޮގްރާމް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު އިފްތިތާޙް ކޮށްދެއްވައިފިއެވެ. ރައީސުލްޖުމްހޫރިއްޔާ މި ޕްރޮގްރާމް އިފްތިތާޙް ކޮށްދެއްވީ މިކަމަށްޓަކައި މިއަދު ހެނދުނު ދިވެހިރާއްޖޭގެ ޤައުމީ ޔުނިވަރސިޓީގެ އޮޑިޓޯރިއަމްގައި ބޭއްވި ރަސްމިއްޔާތެއްގައެވެ.

މިއަދު އިފްތިތާޙްކުރި މުދައްރިސުން ތަމްރީނުކުރުމުގެ ޤައުމީ ޕްރޮގްރާމަކީ ދިވެހިރާއްޖޭގެ ތަޢުލީމީ ދާއިރާއަށް ދިމާވެފައިވާ މުދައްރިސުން ލިބުމުގެ ދަތިކަމަށް ހައްލެއް ހޯދުމަށާއި ތަޢުލީމީ ދާއިރާގައި ދޭސީ މުދައްރިސުން އިތުރުކުރުމަށް އަމާޒުކޮށް ރައީސުލްޖުމްހޫރިއްޔާގެ ސީދާ ބެއްލެވުމުގެ ދަށުން ފެއްޓެވި ޕްރޮގްރާމެކެވެ. ޕްރޮގްރާމް އަމާޒުކޮށްފައިވަނީ މަތީ ސާނަވީ ތަޢުލީމު ނިންމުމަށްފަހު ނިކުންނަ ދަރިވަރުންނަށެވެ.

މި ޕްރޮގްރާމްގެ ދަށުން މުދައްރިސުން ތަމްރީނުކުރުމުގެ ކޯހުގައި ދަރިވަރުން ބައިވެރިވާ 21 ސްކޫލަކާ ރައީސުލްޖުމްހޫރިއްޔާ މިއަދު ލިޔުން ހަވާލުކުރެއްވިއެވެ. މި ތަމްރީނު ޕްރޮގްރާމްގައި 21 ސްކޫލުން ޖުމްލަ 135 ދަރިވަރުން ބައިވެރިވާނެއެވެ. 21 ސްކޫލްގެ ތެރެއިން މާލެއަށް ނިސްބަތް ވަނި ސީއެޗްއެސްއީގެ ދެ ސްކޫލާއި, އަހުމަދިއްޔާ އިންޓަރނޭޝަނަލް ސްކޫލާއި, ވިލާ އިންޓަރނޭޝަނަލް ހައި ސްކޫލެވެ. ދެން ހިމެނެނީ އަތޮޅުތަކުގެ ރަށްރަށުގެ ސްކޫލްތަކެވެ.

މިއަދު ފެށިގެން ދިޔަ މުދައްރިސުން ތަމްރީނުކުރުމުގެ ޕްރޮގްރާމުގެ ސަބަބުން މަތީ ސާނަވީ ތަޢުލީމު ނިންމައި ވަޒީފާގެ މާޙައުލަށް ނިކުންނަ އެތައް ދަރިވަރުންނެއް ދޭސީ މުދައްރިސުންގެ ގޮތުގައި ތަޢުލީމީ ދާއިރާގައި ޚިދުމަތް ކުރުމުގެ މަގުފަހިވެ، ތަޢުލީމީ ދާއިރާއަށް ދޭސީ މުދައްރިސުން ލިބުމުގެ ދަތިކަން ހައްލުކުރުމަށް އެހީއަކަށް ވެގެންދާނެއެވެ.