ރިޔާސީ އިންތިޚާބުގައި ވާދަކުރާނަން: ޔާމީން

ޖަލަށް ނުލައި މިނިވަންކަމާއެކު ހުރެއްޖެނަމަ ކުރިއަށް ރިޔާސީ އިންތިޚާބުގައި ވާދަކުރައްވާނެ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ރާޢްޖެ ޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ރައީސް ޔާމީން ވިދާޅުވީ ވެރިކަމަށް އަލުން ވަޑައިގަތުމުގެ ޝައުގުވެރިވެވަޑައިގަންނަވާ ކަމަށާއި އެއީ މައިގަނޑު ތިން ކަމެއް ހާސިލް ކުރެއްވުމަށް ކަމަށެވެ.

އެގޮތުން އިންޑިއާގެ އަސްކަރިއްޔާއިން ރާޢްޖޭގައި ތިބޭ ތިބުން ނިމުމަކަށް ގެނައުމާއި ރާއްޖޭގެ ކަނޑުން ގެއްލިފައިވާ ބައި ހޯދުން ހިމެނޭ ކަމަށް ރައީސް ޔާމީން ވިދަޅުވިއެވެ.

"އަޅުގަނޑު ކުރިމަތި ލުމުގަ އޮތީ މައިގަނޑޫ ތިން ކަމެއް. ފުރަތަމަ ކަމަކީ ފޯޅަވަހީގެ ކަނޑުގެ ސަރަހައްދު ހޯދުމާއި އަދި ހޯދޭ ކަމަށް ވަންޏާ ފޯޅަވަހި ހޯދުމަށް ކުރަންޖެހޭ ހުރިހާ މަސައްކަތް ކުރުން. ދެން އިންޑިއާ އަސްކަރިއްޔާ މިތަނުން ބޭރުކުން" ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވިއެވެ.

ރައީސް ޔާމީން ވިދާޅުވީ އެމަނިކުފާނު ނޫން އެހެން އެއްވެސް ލީޑަރަކަށް އެދެކަން ކުރައްވަން ކެރިވަޑައި ނުގަންނަވާނެ ކަމަށެވެ.

ޔާމީން އިތުރަށް ވިދާޅުވީ ރާއްޖޭގައި ތިއްބެވި ހުރިހާ ސިޔާސީ ލީޑަރުންނަކީ "ކޮމްޕްރޮމައިޒް" ވެފައި ތިއްބެވި ލީޑަރުން ކަމަށާއި ހަމަ އެކަނި އެ ދެކަން ކުރުމަށްޓަކައިވެސް ޚިދުމަތުގެ އިތުރު ފުރުސަތެއް ބޭނުންފުޅުވާ ކަމަށް ރައީސް ޔާމީން ވިދާޅުވިއެވެ.

ރާއްޖެ ޓީވީގެ ފަށާއިރު ޕްރޮގްރާމްގައި ދެއްކެވި ވާހަކަފުޅުގައި އެމަނިކުފާނު ވަނީ ވެރިކަމުގައި ކުރެއްވި ކަންކަމަކީ ގައުމަށް ފައިދާ ހުރި ކަންކަންކަމަށް ވިދާޅުވެ "ރިގްރެޓް" ކުރައްވާ އެއްވެސް ކަމެއް ނެތް ކަމަށް ވިދާޅުވިއެވެ.

ބޭބޭފުޅު އަދި ކުރީގެ ރައީސް މައުމޫނު ޖަލުގައި ބަންދު ކުރެއްވީ އެމަނިކުފާނު ނޫން ކަމަށާއި އެކަމަކީ ފުލުހުންގެ އިޖުރާއަތުގެ ތެރެއިން ފުލުހުން އަމިއްލައަށް ކޮށްފައިވާ ކަންކަމަށް ވިދާޅުވެ ޔާމީން ވަނީ އެކަންވެސް ދިފާއު ކުރައްވާފައެވެ.

ޔާމީން ވަނީ ވެރިކަމުގައި ކުރައްވާފައިވާ ކުދި އަދި ބޮޑެތި ތަރައްގީގެ ވާހަކަތައް މި ޕްރޮގްރާމްގައި ހިއްސާ ކުރައްވާފައެވެ.

ޔާމީން ވިދާޅުވި ގޮތުގައި ބޮޑެތި އިމާރާތްތަކާއި ބްރިޖުގެ އިތުރުންވެސް މާލެއަށް އޭރު ދިމާވެފައި އޮތް ކުނީގެ މައްސަލައާއި މާލޭގެ ސަހަރާ ފުރިފައި އޮތް އޮތުމަށް ހައްލެއް ގެނައުންފަދަ ކަންކަމުގެ މައްޗައްވެސް އަލިއަޅުއްވާލައްވާފައެވެ.