އިންތިޚާބީ ނިޒާމް ހަރުދަނާކުރުމަށް، މަޖިލިސް ރައީސާއި ޕީއެންސީގެ ލީޑަރޝިޕުން ފުވައްމުލަކު ރައްޔިތުންގެ މަޝްވަރާ ހޯދުމަށް ގޭގެއަށް!

ރާއްޖޭގެ އިންތިޚާބީ ނިޒާމަށް ގެންނަންޖެހޭ ބަދަލުތަކާއި، އެ ނިޒާމު އިތުރަށް ހަރުދަނާކުރުމާ ގުޅޭގޮތުން ރައްޔިތުންގެ ޚިޔާލާއި މަޝްވަރާ ހޯއްދެވުމަށް، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އާއި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ލީޑަރޝިޕްގެ އިސް ބޭފުޅުން ފުވައްމުލަކު ސިޓީގެ ގޭގެއަށް ޒިޔާރަތްކުރައްވައި، ރައްޔިތުންގެ ޚިޔާލާއި މަޝްވަރާ ހޯދައިފިއެވެ. 

މި ހަރަކާތަކީ ސަރުކާރު ހިންގާ މައި ޕާޓީ، ޕީއެންސީގެ ފަރާތުން ރައްޔިތުންނާ ގާތުން މަސައްކަތްކުރުމަށާއި، ދައުލަތުގެ މުހިންމު ނިންމުންތަކުގައި ރައްޔިތުންގެ ބައިވެރިވުން އިތުރުކުރުމަށް ކުރިއަށްގެންދާ ސިލްސިލާ މަސައްކަތްތަކުގެ ތެރެއިން ހިންގުނު ހަރަކާތެކެވެ. 

މި ޒިޔާރަތުގައި މަޖިލިސް ރައީސް ޢަބްދުއްރަޙީމް ޢަބްދުﷲ އާއި ޕީއެންސީގެ އިސް ބޭފުޅުން ވަނީ ފުވައްމުލަކުގެ އެކި އަވަށްތަކުގެ ގޭގެއަށް ވަޑައިގެން ރައްޔިތުންނާ ބައްދަލުކުރައްވާފައެވެ. މި ބައްދަލުވުންތަކުގައި މައިގަނޑު ގޮތެއްގައި މަޝްވަރާކުރެވުނީ، ރާއްޖޭގައި މިހާރު އޮތް އިންތިޚާބީ ނިޒާމު އިތުރަށް ހަރުދަނާކޮށް، ރައްޔިތުންގެ އިތުބާރު ބޮޑުކުރުމަށްޓަކައި ގެނެވިދާނެ ބަދަލުތަކާ ގުޅޭގޮތުންނެވެ.

މީގެ އިތުރުން، ދާއިރާގެ ތަރައްޤީއަށް ބޭނުންވާ ކަންކަމާއި، ރައްޔިތުންގެ ހުރި ކަންބޮޑުވުންތައް އޮޅުންފިލުވައި، އެކަންކަމަށް ސަރުކާރުގެ ތެރެއިންނާއި މަޖިލީހުގެ ތެރެއިން ހޯދައިދެވޭނެ ހައްލުތަކާ ބެހޭގޮތުންވެސް މައުލޫމާތު ބަދަލުކުރެވުނެވެ.

ޕީއެންސީގެ ލީޑަރޝިޕުން ފާހަގަކުރި ގޮތުގައި، މިފަދަ މަޝްވަރާ ދަތުރުތަކުގެ މަގްސަދަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސިޔާސަތުތަކާ އެއްގޮތަށް، ރައްޔިތުންގެ އަޑު އަހައިގެން ގައުމީ މުހިންމު އިސްލާހުތައް ގެނައުމެވެ.