ޤައުމީ ތަރައްޤީގެ 20 އަހަރުގެ ޕްލޭން އެކުލަވާލުމުގެ މަޝްވަރާތައް ފަށައިފި
ކަނޑައަޅަން މިއުޅެނީ ޖީލެއްގެ ތަސައްވަރު- ރައީސް ޑރ.މުއިއްޒު
ޤައުމީ ތަރައްޤީގެ 20 އަހަރުގެ ޕްލޭން އެކުލަވާލުމުގެ މަޝްވަރާތައް ފަށައިފި އެވެ. މަޝްވަރާތައް ފެށީ މިއަދު މާލޭގައެވެ. މަޝްވަރާތައް ފެށުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބައިވެރިވެވަޑައިގެންނެވިއެވެ.
20 އަހަރުގެ ޤައުމީ ތަރައްޤީގެ ޕްލޭނެއް އެކުލަވާލުމަކީ ރައީސް ޑރ.މުހައްމަދު މުއިއްޒުގެ ވައުދެކެވެ. އެމަނިކުފާނު ވިދާޅުވީ މިޕްލޭނަށް ޤާނޫނީ ބާރުވެރިކަންވެސް ހޯއްދަވައިދެއްވާނެ ކަމަށެވެ. އެގޮތުން މިޕްލެނަސް ވަކި ޤާނޫނެއް ހަދާ, ޤާނޫނު އަސާސީގައިވެސް އެކަން ބަޔާންކުރަން, ޤާނޫނޫ އަސާސީއަށްވެސް އިސްލާހެއް ގެންނަވާނެ ކަމަށެވެ. މަޝްވަރާތައް ފެށުމުގެ ބައްދަލުވުމުގައިވެސް އެމަނިކުފާނު އެކަން ތަކުރާރު ކުރެއްވިއެވެ.
20 އަހަރުގެ ޤައުމީ ތަރައްޤީގެ ޕްލޭން އެކުލަވާލަނީ އެންމެންގެ މަޝްވަރާގެ މަތީންނެވެ. އެގޮތުން ކޮންމެ ރަށެއްގައި މަޝްވަރާތައް ކުރިއަށް ގެންދަވާނެ ކަމަށް ރައީސް ވިދާޅުވިއެވެ. އަދި ކޮންމެ ރަށަކުންވެސް ޕްލޭނަށް އެއްޗެއް ވިދާޅުވާންޖެހޭނެ ކަމަށް އެމަނިކުފާނު ވިދާޅުވިއެވެ. މީގެއިތުރުން އެހެން ދާއިރާތަކުންނާއި ސިޔާސީ ޕާޓީތަކުންވެސް މަޝްވަރާތަކުގައި ބައިވެރިވެ, ޕްލޭނަށް އެއްބާރުލުން ދެއްވަން ރައީސުލްޖުމްހޫރިއްޔާ އެދިވަޑައިގެންނެވިއެވެ. އެމަނިކުފާނު ވިދާޅުވީ މިއީ ސިޔާސީ ކަމެއް ނޫން ކަމަށާއި, އެކުލަވާލަނީ ޖީލެއްގެ ތަރައްޤީގެ ޕްލޭން ކަމަށެވެ.
" 20 އަހަރު ދުވަހަކީ ޖީލެއް. ޖީލެއްގެ ތަސައްވަރު އަޅުގަނޑުމެން މިއުޅެނީ ކަނޑައަޅަން. ކުރިއަށް އޮތް ޖީލުގެ ތަސައްވަރު ކަނޑައަޅަން މިއުޅެނީ. މީކީ ސިޔާސީ ކަމެއްނޫން." ރައީސް ވިދާޅުވިއެވެ.
ރައީސުލްޖުމްހޫރިއްޔ ވިދާޅުވީ ހުރިހާ ދާއިރާތަކުންނާއި ސިޔާސީ ޕާޓީތަކުން މިކަމުގަ ބައިވެރިވާން ބޭނުންފުޅުވާ ކަމަށެވެ. ސިޔާސީ ވިސްނުން ދޫކޮށް ޤައުމީ މިމަސައްކަތުގައި ބައިވެރިވާން އެމަނިކުފާނު އެދިވަޑައިގެންނެވިއެވެ. ރައީސް ޑރ.މުއިއްޒު ވިދާޅުވީ ޤައުމުގެ ތަރައްޤީގެ ޕްލޭންގެ މަސައްކަތަކީ ވަރަށް, ވަރަށް މުހިއްމު ކަމެއް ދީގެން ކުރަންޖެހޭ ކަމެއް ކަމަށެވެ. ސިޔާސީ އޮއިވަރުގައި ޖެހިގެން އެއިރެއްގަ އޮންނަ ސަރުކާރެއްގެ ވިސްނުމާ އެއްގޮތަށް އަބަދު އަބަދު ބަދަލުތަކެއް އަންނަ ގޮތަށް, ގައުމުގެ ތަރައްޤީގެ ކަންކަން ގެންދަން ވެއްޖެ ނަމަ ރައްޔިތުންނަށް އެންމެ ހެޔޮގޮތް ނުލިބިދާނެ ކަމަށް ވިދާޅުވިއެވެ. މިއަދު ކަންތައްތައް ވަމުން ދަނީވެސް އެމަގުން ކަމަށް ވިދާޅުވިއެވެ.
އޭގެ ބަދަލުގައި ރައްޔިތުން ކަނޑައަޅާފަ އޮންނަ މަގަކުން, ދާން ބޭނުންވާ މިސްރާބަށް ދެވޭގޮތަށް ކަންތައްތައް ބައްޓަން ކުރެވިއްޖެނަމަ އެންމެ ރަނގަޅަށް ރައްޔިތުންނަށް ފައިދާވާނެ ކަމަށް ވިދާޅުވިއެވެ. ޤައުމީ ތަރައްޤީގެ 20 އަހަރުގެ ޕްލޭނެއް އެކުލަވާލައްވަން ނިންމެވީ އެސަބަބަށްޓަކައި ކަމަސް ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ އެމަނިކުފާނު ބޭނުންފުޅުވަނީ ގައުމު ތަރައްޤީ ކުރަން ކަމަށެވެ. އަދި ރައްޔިތުން މުއްސަނދިވެ, ފުދުންތެރިވާން ކަމަށެވެ. ގެދޮރުވެރިކަން އެންމެންނަށް ލިބިގެންދާން ބޭނުންފުޅުވާ ކަމަށާއި, ވަޒީފާގެ ފުރުޞަތު ހުރިހާ ރައްޔިތުންނަށް ތަފާތުކުރުމެއް ނެތި ލިބޭނެކަން ޔަގީންވާންވެސް ބޭނުންފުޅުވާ ކަމަށް ވިދާޅުވިއެވެ. އަދި ސިއްހީ ކަންކަމާއި ތައުލީމީ ކަންތައްތަކާއި, އިޖުތިމާއީ ހުރިހާ ކަންތައްތަކެއްވެސް ރަނގަޅު ފެންވަރަށް ގެންދަން ބޭނުންވާކަން ފާހަގަކުރެއްވިއެވެ.
މިއަދު މާލޭގައި ފެށި މަޝްވަރާތަކުގައި ތަފާތު ދާއިރާތަކުން ބޭފުޅުން ބައިވެރިވެވަޑައިގަންނަވައެވެ.
ރިއެކްޝަންސް
