މާލެ-ވިލިމާލެ މަގު ހެދުމުގެ މަސައްކަތަށް ޗައިނާގެ ޓެކްނިކަލް ޓީމެއް އަތުވެއްޖެ
މާލެ-ވިލިމާލެ މަގު ހެދުމުގެ މަސައްކަތް ފެށުމުގެ ކުރިން ބަލަން ޖެހޭ ކަންކަން ބެލުމަށް ޗައިނާގެ ޓެކްނިކަލް ޓީމެއް ރާއްޖެ އަތުވެއްޖެއެވެ. ޗައިނާ ސަރުކާރުން ފޮނުއްވި ޓީމާ އިމާރާތްކުރުމާ ބިނާރާބެހޭ ވުޒާރާއިން ވަނީ ބައްދަލުކޮށް މަޝްވަރާތައް ކުރިއަށް ގެންގޮސްފައެވެ.
ޗައިނާގެ ޓީމުން ރާއްޖެ އައީ ނޮވެމްބަރު ތިންވަނަ ދުވަހުއެވެ. އަދި އިއްޔެ ވަނީ މިނިސްޓްރީގެ ޓެކްނިކަލް ޓީމާއެކު މަޝްވަރާތައް ކުރިއަށް ގެންގޮސްފައެވެ. ޗައިނާގެ ޓެކްނިކަލް ޓީމްގެ މިދަތުރުގައި ސާވޭ ހަދާ, މަސައްކަތް އަމަލީ ގޮތުން ފެށުމުގެ ކުރިން ބަލަން ޖެހޭ ކަންކަން ބަލާނެއެވެ.ފީސިބިލިޓީ ސްޓާޑި ހެދުމާއެކު މަސައްކަތުގައި ޗައިނާގެ ޓެކްނިކަލް ޓީމުން މިއަދުން ފެށިގެން މިމަހުގެ 21 ގެ ނިޔަލަށް އެޓީމް މަސައްކަތް ކުރާނެއެވެ.
https://x.com/MoCImv/status/1853433829119443430
މަގުތަކުގެ ޑިޒައިން ހަދާނީ މިޓީމްގެ ސާވޭގެ މައްޗަށް ބިނާކޮށެވެ. މާލޭގެ މަގުތައް ހަދަނީ ޗައިނާ ސަރުކާރުގެ ހިލޭ އެހީގެ ދަށުންނެވެ. މިމަޝްރޫއު ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިއުލާނު ކުރެއްވީ އެމަނިކުފާނު ޗައިނާއަށް ކުރެއްވި ދަތުރުފުޅުގައެވެ.
މާލޭގެ މަގުތަކުގައި ފެންބޮޑުވުމުގެ މައްސަލަ ބޮޑުވެ, އެކަމަށް ވަގުތީ ހައްލެ ހޯދުމަށްވެސް ސަރުކަރުން ދަނީ މަސައްކަތް ކުރަމުންނެވެ. އެގޮތުން އައިޖީއެމްއެޗް ހިމެނޭ މަގުގައި ފެންބޮޑުވާ މައްސަލައަށް ވަނި ވަގުތީ ހައްލެއް ގެނެސްފައެވެ. ޗައިނާ ސަރުކާރުގެ އެހީގައި އަލުން މަގުތައް ހަދާނީ އެކަމަށް ދާއިމީ ހައްލެއް ލިބޭ ގޮތަށް ކަމަށް ސަރުކާރުން ވަނީ ބުނެފައެވެ. އެއީ މަގުތައް ހަދަނީ ސްމޯޓްވޯޓާ މެނޭޖްމަންޓް ސިސްޓަމާއެކު ކަމަށް ވާތީއެވެ.
ޗައިނާ ސަރުކާރުގެ އެހީގައި މަގުތައް ޒަމާނީ ފެންވަރަށް ހަދާއިރު ފެން ނުހިނދޭ މައްސަލައަށް ހައްލު ހޯދަން ޚާއްޞަ ސަމާލުކަމެއް ދޭނެއެވެ.
ރިއެކްޝަންސް
