ރައީސްގެ ވައުދާ އެއްގޮތަށް ސިޔާސީ މުވައްޒަފުން މަދުކޮށްފި- ތަރުޖަމާނު
ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ޚަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން 248 މުވައްޒަފުން ރައީސުލްޖުމްހޫރިއްޔާ ވަކިކުރައްވައި ކަމަށް އިސްތަރުޖަމާނު ހީނާ ވަލީދު ވިދާޅުވެއްޖެ އެވެ. ހީނާ ވިދާޅުވީ މިނިމުނު އޮކްޓޯބަރު މަހުގެ ނިޔަލަށް 248 ސިޔާސީ މުވައްޒަފުން މަދުކުރެވިފައިވާ ކަމަށެވެ.
އޭގެއިތުރުން ސިޔާސީ މުވައްޒަފުންގެ މަސައްކަތުގެ ފެންވަރު ބަލާ، ކުރުންތެރިކަން އިތުރު ކުރުމަށް ސިޔާސީ މުވައްޒަފުންގެ ޕަރފޯމަންސް ބަލާނެ ނިޒާމެއް ޤާއިމް ކުރުމަށް ކެބިނެޓުން މިހާރު ނިންމާފައިވާ ކަމަށްވެސް ހީނާ ވިދާޅުވިއެވެ.
"މިނިޒާމަށް ވަރަށް އަވަހަށް ޢަމަލު ކުރަން ފަށާނެ." ހީނާ ވިދާޅުވިއެވެ.
އޮކްޓޯބަރު މަހުގެ 15 ވަނަ ދުވަހު ރައީސުލްޖުމްހޫރިއްޔާ ސޯޝަލް މީޑިޔާގައި ކުރެއްވި ޕޯސްޓެއްގައި ވިދާޅުވީ އިގްތިޞާދީ އިސްލާހީ އެޖެންޑާގެ ދަށުން 15 ދުވަސް ތެރޭގައި 228 ސިޔާސީ މުވައްޒަފުން ވަކިކުރައްވާނެ ކަމަށެވެ. އޭގެ ތަފްސީލްވެސް އެމަނިކުފާނު ދެއްވިއެވެ. އެއީ 109 ސީނިއަރ ޕޮލިޓިކަލް ޑައިރެކްޓަރުންނާއި, 69 ޕޮލިޓިކަލް ޑައިރެކްޓަރުންނާއި, 43 ޑެޕިއުޓީ މިނިސްޓަރުންނާއި, 7 ސްޓޭޓް މިނިސްޓަރުންނެވެ.
248 މުވައްޒަފުން ވަކިކުރެއްވީ ރައީސް ވިދާޅުވި މުއްދަތުގައި ކަމެއް ނުވަތަ މިދައުރުގެ ތެރޭގައި ކަމެއް ތަރުޖަމާނު ވިދާޅެއް ނުވެއެވެ. އަދި ވަކިކުރި ސިޔާސީ މުވައްޒަފުންގެ ތަފްސީލެއްވެސް ނުދެއްވައެވެ. މުވައްޒަފުން ވަކިކުރެއްވި ކަމަށް ތަރުޖަމާނު ވިދާޅުވެފައި މިވަނީ ރައީސްގެ ވައުދާ އެއްގޮތަށް މުވައްޒަފުން ވަކިކުރެއްވިތޯ ޢާއްމުންނާއި, ސިޔާސީ ފަރާތްތަކުންވެސް ސުވާލު އުފައްދަމުން ދަނިކޮށެވެ.
ރިއެކްޝަންސް
