ގައްދޫ ބޭރުގައި އޮތް ސަފާރީއަކުން ގިނަ އަދަދެއްގެ ބަނގުރާ އަތުލައިގެންފި

ގދ. ގައްދޫ ބޭރުގައި އޮތް ސަފާރީއަކުން ގިނަ އަދަދެއްގެ ބަނގުރާ އަތުލައިގެންފިއެވެ. ފުލުހުން ބުނީ ބަނގުރާ އަތުލައިގަތީ ގައްދޫ ބޭރުގައި އޮތް ސަފާރިއެއްގައި ގަވާއިދާ ހިލާފަށް ބަނގުރާ ގެންގުޅެ އެތަކެތީގެ ވިޔަފާރިކުރާކަމަށް ޑްރަގް ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނުގައި ކަމަށެވެ.

އެސަފާރީ ފާސްކުރީ ކޯޓު އަމުރުގެ ދަށުންނެވެ. ހޮނިހިރު ދުވަހު ފުލުހުން ހިންގި އޮޕަރޭޝަންގައި އެސަފާރީން 1224 ދަޅު ބަނގުރަލާއި 124 ފުޅި ބަނގުރާ ފެނުނު ކަމަށް ފުލުހުން ބުންޏެވެ. އެ ތަކެއްޗާއެކު ފުލުހުންގެ ބެލުމުގެ ދަށަށް ދެމީހަކު ގެންދިޔަ ނަމަވެސް އެދެމީހުން ވަނީ ސުވާލު ކުރުމަށްފަހު ދޫކޮށްލާފައެވެ. 

ފުލުހުން ބުނީ އެ އޮޕަރޭޝަން ކުރިއަށްގެންދިޔައީ ގައްދޫ ޕޮލިސް ސްޓޭޝަން، ޑްރަގް ނާކޮޓިކްސް އިންޓެލިޖެންސް އަދި ސައުތު ޕޮލިސް ސަބް ރީޖަންގެ ރެޕިޑް ރެސްޕޮންސް އެންޑް ހައިވިސިޕިލިޓީ ޓީމު ގުޅިގެން ކަމަށެވެ.

މައްސަލަ ތަހުގީގު ކުރަމުންދާކަމަށް ފުލުހުން ބުންޏެވެ.