ޓެކްސްތައް ބޮޑުކުރަން ރައްޔިތުން މަޖިލިހުން ފާސްކޮށްފި
ސަރުކާރުން ހުށަހެޅުއްވި ގޮތަށް ޓެކްސްތައް ބޮޑުކުރަން ރައްޔިތުން މަޖިލިހުން މިއަދު ފާސްކޮށްފި އެވެ. އެގޮތުން މިއަދު ފާސްކުރީ ޓޫރިޒަމް ދާއިރާގެ ޓެކްސް ތަކާއި, އޭޑީސީގެ އިތުރުން ވޭޕް މަނާ ކުރުމާ ހަމައަށް ވޭޕާއި ވޭޕްގެ ބައިތަކުން ނަގާ ޓެކްސް ބޮޑުކުރުމަށެވެ.
ޓީޖީއެސްޓީއާއި, ގްރީން ޓެކްސްއާއި ރާއްޖެއިން ބޭރަށް ފުރާ ފަސިންޖަރުންގެ އަތުން ނަގާ ޓެކްސް ބޮޑުކުރަން ފާސްކުރީ 71 މެމްބަރުންގެ ވޯޓުންނެވެ. ދެކޮޅަށް ވޯޓްދެއްވީ 8 މެމްބަރުންނެވެ. ތިން ބިލް މިއަދު މަޖިލިހުން ފާސްކުރުމާއެކު އަންނަ އަހަރުގެ ޖޫން މަހުން ފެށިގެން ޓީޖީއެސްޓީ ނަގާނީ %17 ގައެވެ. ގްރީން ޓެކްސްވެސް ކުރިން 6 ޑޮލަރު ނަގަމުން އައި ތަންތަނުން ކޮންމެ ފަތުރުވެރިއެއްގެ އަތުން 12 ޑޮލަރު ނަގާނެއެވެ. އަދި ކުރިން 3 ޑޮލަރު ނަގަމުން އައި ތަންތަނުން 6 ޑޮލަރު ނަގާނެއެވެ. މިބަދަލު ތަންފީޒު ކުރާނީ އަންނަ އަހަރުގެ ޖުލައި މަހުން ފެށިގެންނެވެ.
ފުރާ މީހުންގެ އަތުން ޓެކްސް ބޮޑު ނުކުރަނީ އިކޮނޮމީ ކްލާހުގައި ދަތުރުކުރާ ދިވެހިން އަތުންނެވެ. އިކޮނޮމީ ކްލާހުގައި ދަތުރުކުރާ ބިދޭސީން އަތުން ނަގަމުން އައި 30 ޑޮލަރުގެ ބަދަލުގައި ދެން ނަގާނީ 50 ޑޮލަރެވެ. ބިޒްނަސް ކްލާހުގައި ދަތުރުކުރާ ދިވެހިންނާއި ބިދޭސީން އަތުންވެސް 120 ޑޮލަރު ނަގާނެއެވެ. ކުރިން ނަގަމުން އައީ 60 ޑޮލަރެވެ. ފަސްޓް ކްލާހުގައި ދަތުރުކުރާނަމަ 240 ޑޮލަރު ނަގާނެއެވެ. ޖެޓްތަކުގައި ދަތުރުކުރާ ފަރާތްތަކުގެ އަތުން 480 ޑޮލަރު ނަގާނެއެވެ.
ވޭޕް މަނާކުރަން ސަރުކާރުން ނިންމާފައިވަނީ ޑިސެމްބަރު 15 ން ފެށިގެންނެވެ. ވޭޕް އެތެރެކުރުން ނޮވެމްބަރު 15 ން ފެށިގެން މަނާވާނެއެވެ. ނޮވެމްބަރު 1-15 އަށް އެތެރެކުރާ ވޭޕުން ނަގާ ޑިއުޓީ ބޮޑުކުރަން ސަރުކާރުން ހުށަހެޅި ގޮތަށް މިއަދު ވަނީ ފާސްކޮށްފައެވެ.
ރިއެކްޝަންސް
