ކޮރަޕްޝަނާއި ނުހައްގު މުއްސަނދިކަން ހޯދާ ފަރާތްތަކުގެ މައްޗަށް ދައުވާކުރަން ހުރި ގޮންޖެހުންތަކަށް ޤާނޫނީ ހައްލު ހޯދަނީ
ކޮރަޕްޝަނާއި ނުހައްގު މުއްސަނދިކަން ހޯދާ ފަރާތްތަކުގެ މައްޗަށް ދައުވާކުރަން ހުރި ގޮންޖެހުންތަކަށް ޤާނޫނީ ހައްލު ހޯދަން މިފެށޭ ހަފްތާގައި އިސްލާހުތައް ހުށަހަޅުއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ސޯޝަލް މީޑިޔާގައި އެމަނިކުފާނު ކުރެއްވި ޕޯސްޓެއްގައި ވިދާޅުވީ ދައުލަތުގެ އިދާރާތަކުގެ ތެރޭގައި އަށަގެންފައިވާ ކޮރަޕްޝަނާއި ނުހައްގު މުއްސަދިކަން ހޯދުމުގެ މައްސަލަތައް ތަހްގީގުކޮށް، ދަޢުވާކުރުމަށް ހުރި ގޮންޖެހުންތައް ނައްތާލުމަށް ދިވެހިރާއްޖޭގެ ޤާނޫނުލްޢުޤޫބާތަށް ގެންނަންޖެހޭ އިސްލާހުތައް މިފެށޭ ހަފްތާގައި ސަރުކާރުގެ ފަރާތުން މަޖިލީހަށް ހުށަހަޅުއްވަން ނިންމަވާފައިވާ ކަމަށެވެ.
" އެގޮތުން، ޤާނޫނުލްޢުޤޫބާތުގެ 515 ވަނަ މާއްދާއަށް ގެނެވޭ އިސްލާހުގެ ސަބަބުން ރައީސުލްޖުމްހޫރިއްޔާއާއި ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ފަނޑިޔާރުން ހިމެނޭގޮތުން، ދައުލަތުގެ މުވައްޒަފުންނާއި ދައުލަތުގެ މުވައްޒަފެއްގެ މަޤާމު އަދާކޮށްފައިވާ ފަރާތްތަކުން ހޯދަމުންދާ ނުވަތަ ހޯދާފައިވާ ނުޙައްޤު މުއްސަނދިކަމުގެ މައްސަލަތައް ބެލުމަށް ފަސޭހަވެގެންދާނެ." ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ކުރިންވެސް ވިދާޅުވެފައިވަނީ މައްސަލަތައް ހައްލުކުރުމަށް ޤާނޫނު އަސާސީއަށް އިސްލާހު ގެންނަން ޖެހޭނަމަ އެކަންވެސް ކުރައްވާނެ ކަމަށެވެ. ރައްޔިތުންގެ މަޖިލިހުގައި ސަރުކާރު ނިސްބަތްވާ ޕީއެންސީގެ ސުޕަރ މެޖޯރިޓީ އެބައޮތެވެ.
ކޮރަޕްޝަނާއި ނުހައްގު މުއްސަނދިކަން ހޯދާ ފަރާތްތަކަށް ދައުވާކުރަން ހުރި ގޮންޖެހުންތައް ނައްތާލުމަށް ޤާނޫނަށް އިސްލާހު ހުށަހަޅުއްވަން ރައީސް ނިންމަވާފައިވާ އިރު ސަރުކާރުގެ ބައެއް ބޭފުޅުންނަށްވެސް އިދިކޮޅު ފަރާތްތަކުން ކޮރަޕްޝަންގެ ތުހުމަތު ކުރެއެވެ. އަދި ކުރީ ސަރުކާރުގެ ފަރާތްތަކަށް މިސަރުކާރުގެ ފަރާތްތަކުން އެފަދަ ތުހުމަތުތައް ކުރެއެވެ.
ރިއެކްޝަންސް
