ސްޕެއިންގައި ފެންބޮޑުވެ 72 މަރު! ވެލެންސިއާގެ މެޗުތައް ފަސްކޮށް, ސްޕެއިންގެ ފުޓްބޯޅައިގެ ތާވަލަށް ބަދަލުތަކެއް
ބުދަ ދުވަހު ސްޕެއިންއަށް ކުރި ގަދަ ވިއްސާރައިގައި ބޯކޮށް ވާރާވެހި, ވެލެންސިއާ ކައިރީގައި އޮންނަ ޝީވާ ޓައުންގައި ކުޑަވަގުތުކޮޅެއްގެ ތެރޭގައި ވަރަށްބޮޑަށް ފެންބޮޑުވެ ގިނަ ގެއްލުންތަކެއް ލިބިއްޖެއެވެ. މިހާދިސާގައި 72 މީހަކު މިހާތަނަށް މަރުވެ, އެތައް ބަޔަކު ގެއްލިފައިވާކަމަށް ރިޕޯޓްތައް ބުނެއެވެ. ސްޕެއިން އަށް 8 ގަޑިއިރުގެ ތެރޭގައި ވަނީ އެއް އަހަރުގެ ވާރޭ ވެހިފައެވެ. އިރު ދެކުނުގެ ޝަހަރުތަކުގައި ބޮޑުވި ފެންގަނޑާއެކު މަގުތަކާއި ރެއިލްވޭތައްވެސް ވަނީ ބަންދުވެފައެވެ.
މި ހާދިސާއާ ގުޅިގެން ކޮޕަ ޑެލް ރޭ ގައި ވެލެންސިއާ އާއި ޕަރލާ ސްކުއޭލާ ކުޅެން ހަމަޖެހިފައިއޮތް މެޗު މިހާރު ވަނީ ފަސްކޮށްފައެވެ. ވެލެންސިއާގެ އަވޭ މެޗު ކުޅެން ހަމަޖެހިފައި އޮތީ ބުދަ ދުވަހު ދުވަހު ޕަރލާގައެވެ. އެއީ ސްޕެއިންގެ ވެރިރަށް, މެޑްރިޑާ 15 މޭލު ދުރުގައި އޮންނަ ޓައުނެކެވެ. ސްޕައިންއަށް ދިމާލި މި ކުއްލި ހާލަތާ ގުޅިގެން ބުދަ ދުވަހު ކުޅުމަށް ހަމަޖެހިފައިވާ މެޗުގެ ތާރީޙް މިހާރުވަނީ 6 ނޮވެމްބަރަށް ބަދަލުކޮށްފައެވެ. މެޗު ކުޅުމަށް ހަމަޖެހިފައިވަނީ ކުރިންވެސް ތާވަލްކުރެވިފައި އޮތް ސްޓޭޑިއަމްގައެވެ. އަދި ކޮޕަރ ޑެލް ރޭ ގެ ކުރިއަށް އޮތް ހަފުތާގެ މެޗުތައް ފަސްކުރުމަށް ވެލެންސިއާ އަދި ލެވަންޓް އިން އެދިފައިވުން ސްޕެއިންގެ ފުޓްބޯޅަ ފެޑެރޭޝަނުންވެސް ވަނީ ގަބޫލުކޮށްފައެވެ.
ސްޕެއިންގެ ފުޓްބޯޅަ ފެޑެރޭޝަން އިން މައުލޫމާތުދީފައިވާ ގޮތުގައި މިކަމާ ގުޅިގެން ތާވަލަށް ގެންނަން ޖެހުނު ބަދަލުތަކާއެކު 5 މެޗެއް ވަނީ މިހާތަނަށް ފަސްކުރަންޖެހިފައެވެ. އަދި އެކަމާ ގުޅޭގޮތުން ކުރަންޖެހޭ މަސައްކަތް ކުރިއަށްދާކަމަށްވެސް ފެޑެރޭޝަނުން މައުލޫމާތު ދީފައިވާ ކަމަށް މީޑިއާގައި ރިޕޯޓްކޮށްފައިވެއެވެ.
ރެއަލް މެޑްރިޑް އާއި ބާސެލޯނާ ހިމެނޭހެން ލަލީގާގެ ގިނަ ކްލަބްތަކުން އަންނަނީ ފެންބޮޑުވުމުގައި މީހުން މަރުވެ ދިޔަ އާއިލާތަކަށް ތައުޒިޔާ ފޮނުވަމުންނެވެ. ބާސެލޯނާއިން ނެރުނު ބަޔާނެއްގައި މި ހާދިސާގައި މަރުވެ, އަދި އާއިލާގެ މީހުން ގެއްލުނު ފަރާތްތަކާއި އެކުގައި ތިބިކަމަށާއި, ވިއްސާރައިގެ އަސަރުކުރި ވެލެންސިއާގެ އަލްބަސޭޓޭ އަދި އަންދަލޫސިއާގެ ގެ މީހުންގެ ހިތާމައިގައި ބައިވެރިވާކަމަށްވެސް ބުނެފައިވެއެވެ. ހޮނިހިރު ދުވަހު ވެލެންސިއާއަށް ދިއުމަށް ހަމަޖެހިފައި އޮތް ރެއަލް މެޑްރިޑްގެ ޓީމުންވެސް ވަނީ ކްލަބްގެ ރައީސް އާއި ޑިރެކްޓަރުން އަދި ކުޅުންތެރިންގެ ނަމުގައި މި ހާދިސާގައި މީހުން މަރުވެ, އާއިލާގެ މެމްބަރުން ގެއްލުނު އާއިލާތަކަށް ތައުޒިޔާ ފޮނުވާފައިވެއެވެ.
"ލަލީގާއިން މި ހާދިސާގައި މަރުވެ, ގެއްލިފައިވާ މީހުން ހިމެނޭ ސްޕެއިންގެ ފުޓްބޯޅަ ކްލަބްތަކަށާއި, އެމީހުންގެ އާއިލާ އަދި ރަޙްމަތްތެރިންނަށް މި ހިތާމަވެރި ދަނޑިވަޅުގައި ތަޢުޒިޔާ ކިޔަން" ލަލީގާއިން އިތުރަށް ބުނެފައިވަނީ ކުރިއަށް އޮތް ދެ ބުރުގެ ހުރިހާ މެޗެއް ފެށުމުގެ ކުރިން މަރުވެ ދިޔަ ފަރާތްތަކުގެ ހަނދާނުގައި ހަމަހިމޭންކަމުގެ ސުކޫތެއް ފާހަގަކުރާނެ ކަމުގައެވެ.
ލަލީގާގައި ވެލެންސިއާ އާއި ރެއަލް މެޑްރިޑް ކުޅޭ މެޗު ހޮނިހިރު ދުވަހު ވެލެންސިއާގެ މެސްޓަލާ ސްޓޭޑިއަމްގައި ކުޅުމަށް ހަމަޖެހިފައިވާ އިރު ވެލެންސިއާއިން ވަނީ މި މެޗުވެސް ފަސްކޮށްދިނުމަށް އެދިފައެވެ. ލަލީގާގެ މަސްދަރަކާ ހަވާލާދީ އީއެސްޕީއެންގައި ރިޕޯޓްކޮށްފައިވާ ގޮތުގައި ކުރިއަށް 24 ގަޑިއިރުގެ ތެރޭގައި އެކަމާ ގުޅޭގޮތުން ލީގުން ވަކިގޮތެއް ނިންމާނެއެވެ.
ސްޕެއިންއަށް ދިމާވި ހާދިސާގައި ގިނަ ބަޔަކު މަރުވެފައިވާއިރު, އެކަމުގެ ހިތާމައިގައި އެގައުމުގެ ސަރުކާރުން ވަނީ ބުރާސްފަތި ދުވަހުން ފެށިގެން ކުރިއަށް އޮތް ތިން ދުވަހަކީ ޤައުމީ ހިތާމައިގެ 3 ދުވަސް ކަމުގައި ކަނޑައަޅާފައެވެ.
ރިއެކްޝަންސް
