ރާއްޖޭގެ ކަނޑުން ގެއްލުނު ބައި ހޯދުމުގެ މަސައްކަތް ހުއްޓައެއް ނުލަން- ބަންޑާރަނައިބު
ރާއްޖޭގެ ކަނޑުން ގެއްލުނު ބައި ހޯދުމުގެ މަސައްކަތް ހުއްޓާ ނުލައްވާކަމަށް ބަންޑާރަނައިބު އަހުމަދު އުޝާމް ވިދާޅުވެއްޖެއެވެ. ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި ނޫސްވެރިއަކު އެކަމާ ގުޅޭގޮތުން ސުވާލުކުރުމުން ބަންޑާރަނައިބު ވިދާޅުވީ އިންޓަރނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) މައްސަލާގައި މަސައްކަތްތަކެއް ކުރަމުން ގެންދަވާ ކަމަށެވެ.
ބަންޑާރަނައިބު ވިދާޅުވީ އިންޓަރނޭޝަނަލް އެކްސްޕާޓުންނާއެކު ކުރެވުނު މަސައްކަތުން ރިޕޯޓެއް އެކުލަވާލެވި ކެބިނެޓަށް ހުށަހެޅުމާ ހަމައަށް އާދެވުނު ކަމަށެވެ. ނަމަވެސް ފޯޅަވަހީގެ ސިޔާދަތީ ބާރު މޮރިޝަސްއަށް ދޫކޮށްލަން އިނގިރޭސިމ ވިލާތުން ނިންމުމާ ގުޅިގެން ގޮންޖެހުންތަކެއް ކުރިމަތިވެފައިވާ ކަމަށެވެ. އިނގިރޭސި ވިލާތުން އެނިންމުން ނިންމެވީ މިމަހުގެ 3 ވަނަ ދުވަހު އެވެ.
ބަންޑާރަނައިބު ވިދާޅުވީ އެނިންމުމަކީ އެމަސައްކަތުގައި ރާއްޖޭގެ ސްޓްރެޖީ ބަދަލުކުރަން ޖެހޭ ކަހަލަ ނިންމުމެއކަމަށެވެ.
" އަނެއްކާވެސް ލަފާދޭ އިންޓަރނޭޝަނަލް އެކްސްޕާޓުންނާ ބައިނަލްއަޤްވާމީ ވަކީލުންނާ މަޝްވަރާ ކުރަމުން މިދަނީ މިކަމުގައި ދެން ކުރިއަށްދާން އެންމެ ރަނގަޅު ގޮތަކީ ކޮބައިތޯ. ލަފާ ލިބުނުހާ އަވަހަކަށް ރިޕޯރޓް ރިވައިސް ކޮށްލާފަ ކެބިނެޓަށް ހުށަހަޅައިގެން ގޮތްތަކެއް ނިންމިގެންދާނެ." ބަންޑާރަނައިބު ވިދާޅުވިއެވެ.
ނަމަވެސް ބަންޑާރަ ނައިބު ވިދާޅުވީ އެކަމަށް ހޭދަވާނީ ކިހާ ދުވަހެއްކަން ދަންނަވަން ނޭންގޭ ކަމަށެވެ. އެއީ އެހެން ބަޔަކު އެކުލަވާލާ ރިޕޯޓެއް ކަމަށް ވިދާޅުވިއެވެ. ގެއްލުނު ކަމަށް ބުނާ ކަނޑުގެ ސަރަހައްދު ހޯދުމަކީ މިސަރުކާރުގެ ވައުދެކެވެ.
ރިއެކްޝަންސް
