ރީތީގެ މުބާރާތުގައި ބައިވެރިވުން ސަރުކާރުން ކުށްވެރިކޮށްފި
ދިވެއްސަކު ދުނިޔޭގެ ރީތިގެ މުބާރާތެއްގައި ބައިވެރިވާތީ ފާޑުކިއުން އަމާޒުވެފައި ވަނިކޮށް, އެކަން ސަރުކާރުން ކުށްވެރިކޮށްފިއެވެ. އެކަން ކުށްވެރިކޮށް ޒުވާނުންނާ ގުޅޭ ވުޒާރާއިން މިއަދު ޢާއްމުކުރި ބަޔާނުގައި ބުނެފައިވަނީ 'މިސް ޔުނިވާސް' ގައި ދިވެއްސަކު ބައިވެރިވަނީ ރާއްޖެ ތަމްސީލް ކުރަން ނޫން ކަމަށެވެ. އަދި ސަރުކާރުން ތަރުހީބުދޭ, ސަރުކާރުގެ ބައިވެރިވުމެއްވެސް އޮތް ކަމެއް ނޫން ކަމަށެވެ.
މިނިސްޓްރީން ބުނ ދިވެހިންގެ ދީނާ, އަޤީދާއާއި, ޘަޤާފަތާއި, ނުގުޅޭ ހަރަކާތްތަކާއި މުބާރާތްތައް ބޭއްވުމާއި އަދި އެކިއެކި ފަރާތްތަކުން ބާއްވާ އެފަދަ ހަރަކާތްތަކާއި މުބާރާތްތަކުގައި ދިވެހިން ބައިވެރިވުމަކީ ދިވެހި ސަރުކާރުން ބަލައިގަންނަ ކަމެއް ނޫން ކަމަށް ބަޔާނުގައި ބުނެފައި ވެއެވެ.
"ރާއްޖެ ތަމްސީލުކުރުމުގެ ނަމުގައި ދިވެއްސަކު އެފަދަ ހަރަކާތަކަށް ދިއުން, ދިވެހި ސަރުކާރުން ކުށްވެރި ކުރަމެވެ. އަދި އެހަރަކާތުގައި ބައިވެރިވުމަށް މަސައްކަތް ކުރަމުންދާ ފަރާތުން އެކަން ހުއްޓާލުމަށްވެސް ގޮވާލަމެވެ" ބަޔާނުގައި ވެއެވެ.
އެމުބާރާތުގައި ދިވެއްސަކު ބައިވެރިވަނީ ސަރުކާރުގެ ބައިވެރިވުމެއް އޮވެގެން ކަމަށް ބައެއް ފަރާތްތަކުން ޚަބަރު ފަތުރާތީ މިނިސްޓްރީން ވަނީ ކަންބޮޑުވުންވެސް ފާޅުކޮށްފައެވެ.
މިސް ޔުނިވާސް 2024 ގައި ބައިވެރިވަނީ ރާއްޖޭގެ މޮޑެލް މަރިޔަމް ޝައިނާ ނަސީމް އެވެ. އެއީ އަންނަ މަހުގެ 16-24 އަށް މެކްސިކޯގައި އޮންނަ މުބާރާތެކެވެ. ސަރުކާރުން އެކަން ކުށްވެރިކޮސް ބަޔާން ނެރިފައި ވަނީ ޢާއްމުން އެކަމަށް ފާޑުކިޔާ, ޚާއްޞަކޮށް ދީނީ އިލްމްވެރިން ހަނުތިބޭ ކަމަށް ބުނެ ކަންބޮޑުވުން ފާޅުކުރަމުން ދަނިކޮށެވެ.
ރިއެކްޝަންސް
