އެއްވެސް ބާރަކަށް ނުފޫޒެއް ނުފޯރުވާނަން- ރައީސް މުއިއްޒު
މިހާތަނަށްވެސް ނުފޫޒެއް ނުފޯރުވަން
ދައުލަތުގެ އެއްވެސް ބާރަކަށް އަދި މިނިވަން މުއައްސަސާއަކަށްވެސް ނުފޫޒެއް ނުފޯރުއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. އެމަނިކުފާނު މިމޭރުމުން އެކްސްގައި ޕޯސްޓެއް މިކުރެއްވީ އެންޓި ކޮރަޕްޝަން ކޮމިޝަނާއި އިލެކްޝަން ކޮމިޝަންގެ ރައީސް އާއި ނައިބުރައީސް އަކީ ރައީސުލްޖުމްހޫރިއްޔާ އައްޔަން ކުރައްވާ ބޭފުޅުންގެ ގޮތުގައި ކަނޑައަޅަން ޤާނޫނަށް އިސްލާހު ހުށަހަޅުއްވާފައި ވަނިކޮށެވެ. އަދި އެއީ މިނިވަން މުއައްސަސާތަކަށް ރައީސުލްޖުމްހޫރިއްޔާ ނުފޫޒު ފޯރުއްވަން ގެންނަ ބަދަލެއް ކަމަށް އިދިކޮޅު އެމްޑީޕީގެ މެމްބަރުން މިއަދު މަޖިލިހުގެ ތަޅުމުގައިވެސް ވިދާޅުވެފައި ވަނިކޮށެވެ.
ރައީސުލްޖުމްހޫރިއްޔާ ވިދާޅުވީ ދައުލަތުގެ އެއްވެސް ބާރެއްގެ، ނުވަތަ މިނިވަން މުއައްސަސާއެއްގެ، ނުވަތަ އިންތިޚާބު ކުރެވޭ އެއްވެސް ބައެއްގެ ބާރުތަކުގެ ތެރެއަށް ނުފޫޒު ފޯރުވުމަކީ އެމަނިކުފާނު މިއަދާ ހަމަޔަށްވެސް ކުރެއްވި ކަމެއް ނޫން ކަމަށެވެ. އަދި ކުރިޔަށް އޮތް ތާނގައިވެސް ކުރާނޭކަމެއްނޫން ކަމަށް ވިދާޅުވިއެވެ.
" އޭގެ ބަދަލުގައި، އެފަދަ ފަރާތްތަކުން ޢަދުލުވެރިކަމާއި، އިންސާފާއި، ހަމަހަމަކަމާއެކު، ވަކި މީހަކަށް ބެލުމެއްނެތި، ހަލުއި ދުވެލީގައި މަސައްކަތްކުރަމުން ދޭތޯ ކަށަވަރުކުރުމާއި އެ މަގަށް ކަންކަން ބައްޓަން ކުރުމަށް ކުރަންޖެހޭ އެންމެހާ ކަންކަން ކުރުމަށް، ޤާނޫނާއި ޤަވާޢިދަށް ގެންނަންޖެހޭ އިސްލާހެއްވާނަމަ އެ އިސްލާޙެއް ގެންނަން ސަރުކާރުން ހުށަހަޅަމުން ގެންދާނެ ވާހަކަ ދަންނަވަން." ރައީސުލްޖުމްހޫރިއްޔާ ވިދާޅުވިއެވެ.
އެންޓިކޮރަޕްޝަން ޤާނޫނަށް އިސްލާހު ހުށަހަޅުއްވަން ސަރުކާރުން ހުށަހެޅުއްވި ބިލަށް މިއަދު މަޖިލިހުގައި ބަހުސްވެސް ކޮށްފައެވެ. އެބިލްގައިވާ ގޮތުން ކޮމިޝަންގެ ރައީސްއާއި ނައިބުރައީސް އައްޔަން ކުރެއްވުމުގެ ބާރު ރައީސުލްޖުމްހޫރިއްޔާއަށް ދެނީ ކޮމިޝަން މެމްބަރުންގެ ތެރެއިންނެވެ. އަދި އެކަމުގައި ރައްޔިތުންގެ މަޖިލިހުގެ ރުހުން އޮންނަން ޖެހެއެވެ.
ރިއެކްޝަންސް
