ތިން ވަޒީރުންނަށް ރުހުން ދީފި
ވަޒީރުންގެ މަޖިލިހަށް ރައީސުލްޖުމްހޫރިއްޔާ ގެންނެވި ބަދަލުތަކާއެކު އަލުން އައްޔަންކުރެއްވި ވަޒީރުންނަށް ރައްޔިތުންގެ މަޖިލިހުން ރުހުން ދީފިއެވެ.
ވަޒީރުންގެ މަޖިލިހަށް ރައީސުލްޖުމްހޫރިއްޔާ ގެންނެވި ބަދަލުތަކާއެކު ކުރިން ފޮރިންގ މިނިސްޓަރު ކަމުގައި ހުންނެވި މޫސާ ޒަމީރު ފިނޭންސް މިނިސްޓަރު ކަމަށް އައްޔަން ކުރެއްވިއެވެ. އަދި ހެލްތް މިނިސްޓަރު ކަމުގައި ހުންނެވި ޑރ.އަބްދުالله ހަލީލް ފޮރިންގ މިނިސްޓަރު ކަމަށް އައްޔަން ކުރެއްވިއެވެ. ހެލްތް މިނިސްޓަރު ކަމަށް އައްޔަން ކުރެއްވީ ރައީސުލްޖުމްހޫރިއްޔާގެ އޮފީހުގައި މިނިސްޓަރު ފެންވަރުގައި ހުންނެވި އަބްދުالله ނާޒިމް އިބްރާހީމް އެވެ.
ތިން ވަޒީރުންނަށްވެސް މަޖިލިހުން ރުހުން ދިނީ ވޯޓްގައި ބައިވެރިވި މެމްބަރުންގެ އިއްތިފާގުންނެވެ. އެބޭފުޅުން ވަޒީރުކަމަށް އައްޔަން ކުރެއްވީ މިދިޔަ ސެޕްޓެމްބަރު މަހުގެ 30 ވަނަ ދުވަހުއެވެ. އެބަދަލު ގެންނެވީ ފިނޭންސް މިނިސްޓަރު ކަމުގައި އޭރު ހުންނެވި ޑރ.މުހައްމަދު ޝަފީޤު އިސްތިއުފާ ދެއްވުމުންނެވެ. އިސްތިއުފާ ދެއްވި ސަބަބެއް ސަރުކާރުންވެސް އަދި ޝަފީގުވެސް ވިދާޅެއް ނުވެއެވެ.
ރިއެކްޝަންސް
