ފްލެޓް ލިސްޓް ފުރިހަމަ ކުރަން އިތުރު ވަގުތު ބޭނުންވޭ, ޢާއްމު ކުރެވޭނީ ނޮވެމްބަރު ދެވަނަ ހަފްތާގެ ނިޔަލަށް- މިނިސްޓްރީ
ފްލެޓް ލިސްޓް ފުރިހަމަ ކުރަން އިތުރު ވަގުތު ބޭނުންވާ ކަމަށާއި, ލިސްޓް ޢާއްމު ކުރެވޭނީ ނޮވެމްބަރު ދެވަނަ ހަފްތާގެ ނިޔަލަށް ކަމަށް ގެދޮރުވެރިކަމާއި ބެހޭ ވުޒާރާއިން ބުނެފިއެވެ. ފްލެޓް ލިބޭ މީހުންގެ ލިސްޓް އިއުލާނުކުރެވޭނީ ނޮވެމްބަރު މަހު ކަމަށްބުނެ, އެ އެވުޒާރާއިން މިއަދު ބަޔާނެއް މިނެރުނީ އޮކްޓޯބަރު މަހުގެ ނިޔަލަށް ލިސްޓް އިއުލާނު ކުރެވޭނެ ކަމަށް ރައްޔިތުންގެ މަޖިލިހުގެ ކޮމިޓީއެއްގައި ވަޒީރު ޑރ.އަލީ ހައިދަރު ވިދާޅުވެފައި ވަނިކޮށެވެ. އަދި އެޔަގީންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒުވެސް ދެއްވާފައި ވަނިކޮށެވެ.
ނަމަވެސް މިއަދު މިނިސްޓްރީން ބުނީ މިސަރުކާރު ހަވާލުވެ އެކުލަވާލި ހައުސިންގ އެޑްވައިޒަރީ ކޮމިޓީއާއި މާލޭ ސިޓީ ކައުންސިލްގެ ހައުސިންގ ކޮންސަލްޓަންސީ ކޮމިޓީން ވެސް ގެދޮރުވެރިޔާ ސްކީމްގެ ދާއިމީ ލިސްޓް އެކުލަވާލާފައިވާ ގޮތް ރަނގަޅު ކަމަށް ނުފެންނާތީ ރީ-އިވެލުއޭޓް ކުރުމުގެ މަސައްކަތް އަލުން މިނިސްޓްރީން ފަށާފައިވާ ކަމަށެވެ.
"މިމަސައްކަތް ފުރިހަމައަށް ނިންމާލުމަށް އިތުރު ވަގުތު ބޭނުންވާތީ, މިއަހަރުގެ ނޮވެންބަރު މަހުގެ ދެވަނަ ހަފްތާގެ ނިޔަލަށް ވަގުތީ ލިސްޓް ޢާއްމުކުރުމުގެ މަސައްކަތްތައް މިނިސްޓްރީން ކުރަމުންދާނެ ވާހަކަ މައުލޫމާތަށްޓަކައި ދެންނެވީމެވެ."
މިސަރުކާރު ވެރިކަމާ ހަވާލުވިއިރު މިދިޔަ ސަރުކާރުން އޮތީ އެސަރުކާރުން އިމާރާތް ކުރަން ފެށި ފްލެޓްތަކުގެ ތެރެއިން އެކި މަރުހަލާގައިވާ 4000 ފްލެޓް ލިބޭ މީހުންގެ ދާއިމީ ލިސްޓް ގެޒެޓްކޮށް އެއްބަސްވުންވެސް ހިއްސާކޮށްފައެވެ. ނަމަވެސް މިސަރުކާރުން އަލުން ލިސްޓް ރީއިވެލުއޭޓް ކުރަން ފެށީ ލިސްޓް އެކުލަވާލުމުގައި ކޮރަޕްޝަނަށް މަގުފަހިވާ ކަންތައްތަކެއް ހުރުކަމަށް ތުހުމަތުކޮށް, ޢާއްމު ފަރާތަކުން އޭސީސީއަށް ހުށަހެޅި މައްސަލައަކާ ގުޅިގެންނެވެ.
ރިއެކްޝަންސް
