އީސީއާއި އޭސީސީގެ ރައީސްއާއި ނައިބު ރައީސް އަކީ ރައީސުލްޖުމްހޫރިއްޔާ އައްޔަންކުރައްވާ ބޭފުޅުން ކަމަށް ހަދަން ހުށަހަޅައިފި
އިލެކްޝަން ކޮމިޝަނާއި, އެންޓިކޮރަޕްޝަން ކޮމިޝަންގެ ރައީސްއާއި ރައީސުލްޖުމްހޫރިއްޔާ އައްޔަންކުރައްވާ ބޭފުޅުން ކަމަށް ހަދަން ޤާނޫނަށް އިސްލާހު ހުށަހަޅައިފިއެވެ.
ސަރުކާރުގެ ފަރާތުން ވަނީ މިދެ އިސްލާހު ގެނައުމަށް އިލެކްޝަން ކޮމިޝަންގެ ޤާނޫނަށާއި, އެންޓިކޮރަޕްޝަންގެ ޤާނޫނަށް އިސްލާހު ހުށަހަޅުއްވާފައެވެ. އިލެކްޝަން ކޮމިޝަންގެ ޤާނޫނަށް އިސްލާހު ގެންނަން ހުށަހެޅުއްވީ ކެލާ ދާއިރާގެ މެމްބަރު އަބްދުالله ޝަރީފެވެ. އަދި އެންޓިކޮރަޕްޝަން ޤާނޫނަށް އިސްލާހު ގެންނަން ހުށަހެޅުއްވީ ފެލިދޫ ދާއިރާގެ މެމްބަރު އާދަމް ޒާހިރެވެ.
އިލެކްޝަން ކޮމިޝަންގެ ޤާނޫނަށް ހުށަހަޅާފައި ވަނީ 7 ވަނަ މާއްދާ ބަދަލުކުރުމަށެވެ. އެމާއްދާ ބަދަލުކުރަން ހުށަހަޅާފައި ވަނީ ކޮމިޝަންގެ މެމްބަރުންގެ ތެރެއިން ރައީސް އަކާއި ނައިބުރައީސްއެއް ރައީސުލްޖުމްހޫރިއްޔާ އައްޔަން ކުރައްވަން ޖެހޭ ގޮތަށެވެ. އަދި އެކަން ކުރައްވާ ކޮންމެ ފަހަރަކު ރައްޔިތުންގެ މަޖިލިހަށް ނަން ހުށަހަޅުއްވާ ގޮތަށެވެ. މަޖިލިހުގެ ވޯޓްގައި ބައިވެރިވާ މެމްބަރުންގެ އަޣްލަބިއްޔަތުން ފާސްކުރުމުން މަގާމަށް އައްޔަން ކުރައްވާނީ ރައީސުލްޖުމްހޫރިއްޔާ ކަމަށް އިސްލާހުގައި ވެއެވެ.
މީގެއިތުރުން ކޮމިބަންގެ ރައީސްއާއި ނައިބުރައީސް އިސްތިއުފާދެއްވަން ބޭނުންވެއްޖެ ނަމަވެސް އިސްތިއުފާގެ ސިޓީ ރައީސުލްޖުމްހޫރިއްޔާއަށް ހުށަހަޅަން ޖެހޭ ގޮތަށް ވަނީ އިސްލާހު ހުށަހަޅުއްވާފައެވެ.
މިހާރު ކޮމިޝަންގެ ރައީސްއާއި ނައިބުރައީސް ކަނޑައަޅަނީ ކޮމިޝަންގެ މެމްބަރުންގެ ތެރޭގައި ނަގާ ވޯޓަކުންނެވެ.
އެންޓިކޮރަޕްޝަންގެ ޤާނޫނަށް ހުށަހެޅުއްވި އިސްލާހުގައި ބުނެފައިވަނީ ވެސް އިލެކްޝަން ކޮމިޝަނަށް ރައީސްއާއި ނައިބުރައީސް އައްޔަންކުރެއްވި ފަދައިން އައްޔަންކުރެއްވުމަށެވެ. އަދި އިސްތިއުފާ ދޭން ބޭނުންވެއްޖެ ނަމަވެސް އެއުސޫލުން އަމަލުކުރުމަށެވެ. އެޤާނޫނުގެވެސް 7 ވަނަ މާއްދާ އެގޮތަށް އިސްލާހުކުރަން ވަނީ ހުށަހަޅާފައެވެ.
މިދެބިލްގެވެސް ފުރަތަމަ ކިޔުން މިއަދުގެ ރައްޔިތުންގެ މަޖިލިހުގެ ޖަލްސާއަށް ވަނީ އެޖެންޑާކުރައްވާފައެވެ.
ރިއެކްޝަންސް
