ދިވެހިންގެ ނިންމުމަށް އިންޑިއާ އިން އިޙްތިރާމްކުރާނެ: ރައިސް

ދިވެހިންގެ ނިންމުމަށް އިންޑިއާ އިން  އިޙްތިރާމްކުރާނެ ކަމަށް ޤަބޫލުފުޅުކުރައްވާ ކަމަށް ރައިސް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރައީސުލްޖުމްހޫރިއްޔާކަމުގެ މަޤާމާ ޙަވާލުވެވަޑައިގަތުމަށްފަހު އިންޑިއާގެ ނޫހަކަށް ދެއްވި ފުރަތަމަ ބަސްދީގަތުމުގައެވެ. އެގޮތުން، އެމަނިކުފާނުގެ ސަރުކާރުން އެއްވެސް ޤައުމަކާ ދެކޮޅު ނޫންކަން ފާހަގަކުރައްވާ، ގެންގުޅުއްވަނީ "ރާއްޖެ ފުރަތަމަ" ޕޮލިސީކަމަށް ރައީސް ވިދާޅުވިއެވެ.

ޓައިމްސް އޮފް އިންޑިއާއަށް ދެއްވި ބަސްދީގަތުމުގައި، ދިވެހިރާއްޖެއާއި އިންޑިއާ ދެމެދު އޮތް ގުޅުމަކީ އިންޑިއާ ސިފައިން ރާއްޖޭގައި ދާއިމަށް ޤާއިމުވެ ނުތިބި ނަމަވެސް ދެމެހެއްޓޭނެ ގުޅުމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

އިންޑިއާ އަކީ ދުނިޔޭގެ އެންމެ ބޮޑު އެއް ޑިމޮކްރަސީއަށްވާއިރު ދިވެހިންގެ ނިންމުމަށް އެ ޤައުމުން އިޙްތިރާމްކުރާނެ ކަމަށް ޤަބޫލުފުޅުކުރައްވާ ކަމަށާއި، އެއްވެސް ކޮޅެއް ނެގުމަށް ރާއްޖެއަށް މަޖުބޫރުކޮށްގެން ނުވާނެ ކަމަށާއި،  ރާއްޖެއިން މަސައްކަތް ކުރާނީ ޤައުމުތަކާ ގުޅިގެން ބައިނަލްއަގުވާމީ އަދި ސަރަޙައްދީ ހަމަޖެހުން ޤާއިމުކުރުމުގެ މަޤްޞަދުގައިކަމަށްވެސް  ރައީސް ޑރ. މުޢިއްޒު ވިދާޅުވިއެވެ.

އިންޑިއާއާއެކު ރާއްޖޭން ވެފައިވާ އެއްވެސް އެއްބަސްމެއް ބާތިލުކޮށްފައިނުވާނެކަން ފާހަގަކުރައްވާ ރައީސް ވިދާޅުވީ، ސަރުކާރުން ނިންމީ އެ އެއްބަސްވުންތައް ބާތިލު ނުކުރަން ކަމަށެވެ. މިގޮތަށް ނިންމެވީ ރާއްޖޭގެ އެޖެންސީތައް ބާރުވެރިކުރުވުމުގެ މަޤްޞަދުގައިކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ދިވެހިރާއްޖެއާއި އިންޑިއާ ދެމެދު އޮތް ގުޅުމަކީ ގިނަ ޒަމާންވެފައިވާ ވަރުގަދަ ގުޅުމެކެވެ.