ވޭޕް އެތެރެކުރުން މަނާކުރުމާ ހަމައަށްވެސް ޑިއުޓީ ބޮޑުކުރަން ހުށަހަޅައިފި
ވޭޕާއި, ވޭޕްގެ ބާވަތްތައް ރާއްޖެ އެތެރެކުރުން މަނާކުރުމާ ހަމައަށްވެސް އެއިން ނަގާ ޑިއުޓީ ބޮޑުކުރަން ހުށަހަޅައިފި އެވެ.
ވޭޕާއި އީ ސިނގިރޭޓުން ނަގާ ޑިއުޓީ ބޮޑުކުރަން ސަރުކާރުން ވަނީ ރައްޔިތުންގެ މަޖިލިހަށް ބިލެއް ހުށަހަޅުއްވާފައެވެ. އެބިލް ހުށަހެޅުއްވީ މައްޗަންގޮޅި އުތުރު ދާއިރާގެ ޕީއެންސީގެ މެމްބަރު އިބްރާހީމް މުޙައްމަދެވެ. މިފަދަ ބިލެއް ހުށަހެޅިއިރު އަންނަ ނޮވެމްބަރު މަހުގެ 15 ވަނަ ދުވަހުން ފެށިގެން ވޭޕާއި, ވޭޕްގެ ބާވަތްތައް ރާއްޖެ އެތެރެކުރުން މަނާކުރަން ރައީސުލްޖުމްހޫރިއްޔާ ވަނީ ނިންމަވާފައެވެ. އަދި ޑިސެމްބަރު 15 ވަނަ ދުވަހުން ފެށިގެން ރާއްޖޭގައި ވޭޕް ބޭނުންކުރުން މަނާކުރަންވެސް ވަނީ ނިންމަވާފައެވެ.
ވޭޕް އެތެރެކުރުން މަނާކުރަން ނިންމާފައިވަނިކޮށް, ޑިއުޓީ ބޮޑުކުރަން ނިންމެވި ނިންމެވުމާ ގުޅޭގޮތުން ބަންޑާރަނައިބު އަހުމަދު އުޝާމް ވިދާޅުވީ އެނިންމެވުމަކީ 15 ދުވަހަށް ނިންމަވާ ނިންމެވުމެއް ކަމަށެވެ.
" ގާނޫނަށް ހުށަހަޅާފައިވާ އިސްލާހަކީ 1 ނޮވެމްބަރ އިން ފެށިގެން 15 ނޮވެމްބަރ 2024 މި މުއްދަތުގެ ތެރޭގައި އެތެރެކުރާ ވޭޕްކުރުމަށް ބޭނުންކުރާ ތަކެތީގެ ޑިއުޓީ ބޮޑުކުރުމަށް ހުށަހަޅާފައިވާ އިސްލާހެއް." އުޝާމް ވިދާޅުވިއެވެ.
އޭނާ ވިދާޅުވީ ރައީސުލްޖުމްހޫރިއްޔާ ނިންމަވާފައިވަނީ 1 ނޮވެމްބަރ 2024 އިން ފެށިގެން ދުންފަތުގެ ޑިއުޓީ ބޮޑުކުރުމަށް އަދި 15 ނޮވެމްބަރ 2024 އިން ފެށިގެން ވޭޕު ކުރުމަށް ބޭނުންކުރާ ތަކެތި އެތެރެކުރުން މަނާކުރުމަށް ކަމަށެވެ.
ރިއެކްޝަންސް
