ފާޑުކިއުންތަކާއެކު ފުލުހުންގެ ނިންމުން ބަދަލުކޮށް, މާދަމާރޭ 12:00 ގެ ކުރިން ދެ އެޕާރޓްމަންޓް ހަވާލުކުރަން ބައްސާމަށް އަންގައިފި
ފާޑުކިއުންތަކާއެކު ފުލުހުންގެ ނިންމުން ބަދަލުކޮށް, މާދަމާރޭ 12:00 ގެ ކުރިން ދެ އެޕާރޓްމަންޓް ހަވާލުކުރަން އެފްއޭއެމްގެ ކުރީގެ ރައީސް ބައްސާމް އަދީލް ޖަލީލަށް އަންގައިފި އެވެ.
ފުލުހުންގެ ނިންމުން ބަދަލުކޮށްފައި މިވަނީ ބައްސާމްގެ ފަރާތުން އެދުނު އެދުމަށް އެޕާރޓްމަންޓް ހަވާލުކުރުމަށް މިމަހުގެ ނިޔަލަށް ފުރުޞަތު ދިނުމަށްފަހުއެވެ. މިމަހުގެ ނިޔަލަށް ފުރުޞަތު އިތުރުކޮށްދިނީ " ހާލަތަށް ރިއާޔަތްކޮށް" ކަމަށް ފުލުހުން ރޭ މީޑިޔާއަށް ހިއްސާކުރި މެސެއްޖެއްގައި ބުންޏެވެ. އޭގެ ފަހުން 24 ގަޑިއިރުވެސް ނުވަނީސް އެހާލަތު ބަދަލުވެ, ފުލުހުން ޢާއްމުކުރި ބަޔާނެއްގައި ބުނީ "އިތުރަށް ދިރާސާކޮށް ބެލިބެލުމުން އެދިފައިވާ (ބައްސާމް) ގޮތަށް މުއްދަތު އިތުރުކޮށްދެވެން ނެތްކަމަށް " ފުލުހުންގެ ޚިދުމަތުން ނިންމާފައިވާ ކަމަށެވެ.
ފުލުހުން ބުނީ މާދަމާރޭ 12:00 ގެ ކުރިން އެޕާރޓްމަންޓް ހަވާލުނުކޮށްފިނަމަ ޤާނޫނީ އިމުގެ ތެރެއިން އެޕާރޓްމަންޓް ފުލުހުންގެ ބެލުމުގެ ދަށަށް ނެގުމަށްޓަކައި އަޅަންޖެހޭ ފިޔަވަޅުތައް އަޅަމުންދާނެ ކަމަށެވެ.
ދެއެޕާރޓްމަންޓް ފުލުހުންނާ ހަވާލުކުރަން މިދިޔަ މަހުގެ 28 ވަނަ ދުވަހު އަމުރުކުރީ ހުޅުމާލެ
މެޖިސްޓްރޭޓް ކޯޓުންނެވެ. ހުޅުމާލެ އަމިން އެވެނިޔު އިން ބައްސާމް އެދެއެޕާރޓްމަންޓް ގަނެފައިވަނީ ހިޔާނާތުގެ ފައިސާއިން ކަމަށް ތުހުމަތު ކުރެއެވެ. އެއީ ކޮވިޑްގެ ތާށިކަމުގައި ލްލަބްތަކަށް އެހީވުމަށް ފީފާއިން ދިން ލޯނު ފައިސާއެވެ.
ފީފާއިން މިހާރު ވަނީ ބައްސާމް 9 މަސް ދުވަހަށް ސަސްޕެންޑް ކޮށްފައެވެ. ނަމަވެސް އާ އިންތިޚާބަކަށް ދާއިރު ބައްސާމްގެ ސަސްޕެންޝަންގެ މުއްދަތު ހަމަވާނެއެވެ.
ރިއެކްޝަންސް
