ކަނޑަށް ގެއްލުނު އޮފިސަރު އިއްބެގެ ހަނދާނުގައި ބަންގްލަދޭޝްގައި މިސްކިތެއް
ހުވަދޫ ކަނޑަށް ބަންޑުން ޖަހާލި ސަޕްލައި ދޯނި ސަލާމަތްކުރުމުގެ މަސައްކަތުގައި އުޅެނިކޮށް ގެއްލުނު ސިފައިންގެ އޮފިސަރު، ގދ. ތިނަދޫ، އިބްރާހިމް އަޙްމަދު (އިއްބެ) ގެ ހަނދާނުގައި އަގުހުރި ޞަދަޤާތެއްގެ ގޮތުން ބަންގްލަދޭޝްގައި މިސްކިތެއް ބިނާކުރުމަށް އާންމުންގެ އެހީއަށް ހުޅުވާލައިފިއެވެ.
މިދިޔަ އޮގަސްޓް މަހުގެ 5 ވަނަ ދުވަހު ހިނގި މި ހިތާމަވެރި ހާދިސާގައި ދޯންޏާއި މުދާ ސަލާމަތްކުރަން އުޅުމުގެ ތެރޭގައި އިއްބެގެ އިތުރުން ފުލުސް އޮފިސަރަކާއި އެ ދޯނީގެ ދިވެހި ކެޕްޓަން ވެސް ވަނީ ކަނޑުވެ ގެއްލިފައެވެ.
މިސްކިތް ބިނާކުރުމުގެ މަޝްރޫޢު:
ތިނަދޫގައި އިޖުތިމާޢީ އެކި ހަރަކާތްތައް ހިންގަމުން އަންނަ "ލޮކާސް" ޖަމްޢިއްޔާއިން އިސްނަގައިގެން ކުރިއަށްގެންދާ މި ޚާއްޞަ މަސައްކަތުގެ މައިގަނޑު ތަފްޞީލުތަކަކީ:
- މިސްކިތުގެ ޖާގަ: އެއްފަހަރާ 120 މީހުންނަށް ނަމާދުކުރެވޭ ވަރުގެ ޖާގައެއް.
- ބިމުގެ ބޮޑުމިން: 950 އަކަފޫޓު.
- ބޭނުންވާ ފައިސާގެ އަދަދު: 300،000 (ތިންލައްކަ) ދިވެހި ރުފިޔާ.
ލޮކާސް އިން ފާހަގަކުރި ގޮތުގައި މިއީ އިއްބެގެ ހެޔޮ ހަނދާންތައް އާކޮށް، އަންނަން އޮތް ޖީލުތަކަށް ދެމިގެންދާނެ ފަދަ ހެޔޮ ޢަމަލެއް (ޞަދަޤާތުލް ޖާރިޔާއެއް) ކޮށްދިނުމުގެ މަޤްޞަދުގައި ކުރިއަށްގެންދާ ޕްރޮޖެކްޓެކެވެ. އެހެންކަމުން މި ދަރުމަވެރި މަސައްކަތުގައި ވީހާވެސް ގިނަ ފަރާތްތަކަކުން ބައިވެރިވެ އެހީތެރިވެދިނުމަށް އެ ޖަމްޢިއްޔާއިން ވަނީ އެދިފައެވެ.
ރިއެކްޝަންސް





