ވެލާނާ އިންޓަނޭޝަނަލް އެއާޕޯޓުގެ ޓާމިނަލް 1 ގައި ދަތުރުވެރިންނަށް ޚާއްސަ އާ ޖާގައެއް ހުޅުވައިފި

ވެލާނާ އިންޓަނޭޝަނަލް އެއާޕޯޓުން ދަތުރުކުރާ ފަރާތްތަކަށް އިތުރު ލުއިފަސޭހަކަމާއި އަރާމު މާހައުލެއް ފޯރުކޮށްދިނުމުގެ ގޮތުން، އެއާޕޯޓުގެ ޓާމިނަލް 1 ގައި ތަރައްގީކުރި އާ ސަރަހައްދެއް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން ބޭނުންކުރަން ފަށައިފިއެވެ.

މި މަހުގެ 25 ވަނަ ދުވަހު ރަސްމީކޮށް ހުޅުވި މި ޖާގައަކީ އެއާޕޯޓުން ފުރާ ފަރާތްތަކަށް ލިބޭ ޚިދުމަތްތަކުގެ ފެންވަރު މަތިކޮށް، ދަތުރުވެރިންނަށް ހިތްގައިމު މާހައުލެއް ބިނާކުރުމަށް އެމް.އޭ.ސީ.އެލް އިން ކުރަމުންދާ މަސައްކަތުގެ ދަށުން އެޅުނު މުހިންމު ފިޔަވަޅެކެވެ.

އަލަށް ހުޅުވި މި ސަރަހައްދާއެކު، ޓާމިނަލްގެ ފުރަތަމަ ބުރީގައި ފަސިންޖަރުން މަޑުކޮށްލައިގެން ތިބުމަށް ގާތްގަނޑަކަށް 750 އަކަމީޓަރުގެ ބޮޑު ޖާގައެއް ވަނީ އިތުރުވެފައެވެ. މިތަނުގައި ދަތުރުވެރިން ފުރުމުގެ ކުރިން އަރާމުކޮށްލުމަށްޓަކައި ތަފާތު ވައްތަރުގެ ގޮނޑިތައް ފަރުމާކޮށް އަތުރާފައިވަނީ ފަސޭހަކަމާއެކު ބޭނުންކުރެވޭނެ ގޮތަށެވެ.

މީގެ އިތުރުން، އާއިލާތަކާއި ކުޑަކުދިންނަށް އަމާން އަދި އުފާވެރި ވަގުތުކޮޅެއް ހޭދަކުރެވޭނެ ގޮތަށް 136 އަކަމީޓަރުގެ ޚާއްސަ ކުޅޭ ސަރަހައްދެއްވެސް މި ޖާގައިގައި ވަނީ ހިމަނާފައެވެ. މި ސަރަހައްދުގައި އެކި ލެވެލްތަކުގެ ޕްލޭ ފްލެޓްފޯމްތަކާއި، ރައްކާތެރި ހޮޅިތަކާއި، ވާ އަދި ރިންގު ބޭނުންކޮށްގެން އަރާ ފޭބޭނެ ވަސީލަތްތަކުގެ އިތުރުން ބޯޅަ ކުޅޭ ޖާގައެއް ވަނީ ގާއިމުކޮށްފައެވެ.

ދަތުރުވެރިންނަށް ބޭނުންވާ މާލީ ޚިދުމަތްތަކަށް ލުޔެއް ހޯދައިދިނުމުގެ ގޮތުން، ބޭންކް އޮފް މޯލްޑިވްސް (ބީއެމްއެލް) ގެ ޚާއްސަ ކައުންޓަރެއްވެސް މި ސަރަހައްދުގައި ވަނީ ގާއިމުކޮށްފައެވެ. މި ކައުންޓަރު މެދުވެރިކޮށް ބޭރު ފައިސާ މާރުކުރުމާއި، ދިވެހި ރައްޔިތުންނަށް ޑޮލަރު ދޫކުރުމުގެ ޚިދުމަތް ލިބިގެންދާނެއެވެ.

އެމް.އޭ.ސީ.އެލް އިން ހާމަކުރި ގޮތުގައި، މި އާ ޖާގަ ހުޅުވުމަކީ ޓާމިނަލް 1 ގެ ޚިދުމަތްތައް ޒަމާނީ ފެންވަރަށް ތަރައްގީކުރުމަށް ލިބުނު ބޮޑު ކުރިއެރުމެކެވެ. އަދި މިއީ ވެލާނާ އިންޓަނޭޝަނަލް އެއާޕޯޓަކީ ފަސިންޖަރުންގެ ބޭނުންތަކަށް އިސްކަންދޭ، ހުރިހާ ފަރާތްތަކަށް ފަސޭހައިން ބޭނުންކުރެވޭނެ ތަނަކަށް ހެދުމަށް ކުންފުނިން ދޭ އަހަންމިއްޔަތު ރަމްޒުކޮށްދޭ ކަމެކެވެ.