މި އަހަރުގެ މިހާތަނަށް ހިމަބިހީގެ 66 ކޭސް ރިޕޯޓުކޮށްފި: ރައްކާތެރިކަމުގެ ފިޔަވަޅު އެޅުމަށް އެޗްޕީއޭއިން އިލްތިމާސްކޮށްފި

މި އަހަރުގެ މިހާތަނަށް ދިވެހިރާއްޖެއިން ހިމަބިހީގެ 66 ކޭސް ރިޕޯޓުކޮށްފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭއިން މިއަދު އާންމުކުރި މައުލޫމާތުގައިވާ ގޮތުން، ވޭތުވެދިޔަ ހަފްތާގެ ތެރޭގައި އެކަނިވެސް މާލެ ސަރަހައްދުން ހިމަބިހީގެ 44 ކޭސް ވަނީ ފެނިފައެވެ. މިއާއެކު މި އަހަރުގެ މިހާތަނަށް މި ބަލި ޖެހިގެން ރިޕޯޓުކުރި މީހުންގެ ޖުމްލަ އަދަދު މިވަނީ 66 އަށް އަރާފައެވެ.

ބަލި ފެތުރުން ހުއްޓުވުމަށްޓަކައި އެޗްޕީއޭއިން ވަނީ ރައްކާތެރިކަމުގެ ފިޔަވަޅުތައް ވަރުގަދަކުރުމަށް އިލްތިމާސްކޮށްފައެވެ. އެގޮތުން، ހުންއައިސް ގައިގައި ރަތް ބިހިތަކެއް ނަގައިފިނަމަ، ލަސްނުކޮށް ޞިއްޙީ ފަރުވާ ހޯދުމަށާއި، ޑޮކްޓަރަށް ދެއްކުމަށްދާއިރު މާސްކު އެޅުމަށް އެޗްޕީއޭއިން ހަނދާންކޮށްދެއެވެ. އަދި ބައްޔަށް ޝައްކުވެގެން ޓެސްޓެއް ހަދައިފިނަމަ، ޓެސްޓުގެ ނަތީޖާ ލިބެންދެން އެކަހެރިވެގެން ހުރުމަށާއި، ބަލީގެ އަލާމާތެއް ހުރިނަމަ މީހުން އެއްވެ އުޅޭ ތަންތަނަށް ނުދިއުމަށްވެސް އެ އެޖެންސީން ވަނީ އެދިފައެވެ.
ހިމަބިއްސަކީ "މީސްލްސް ވައިރަސް" ގެ ސަބަބުން ޖެހޭ، ވައިގެ ޒަރިއްޔާއިން ވަރަށް ފަސޭހައިން ފެތުރޭ ނުރައްކާތެރި ބައްޔެކެވެ. މިއީ ޕެރަމިކްސޯ ވައިރަސްގެ ތެރޭގައި ހިމެނޭ "މޯބިލިވައިރަސް" އެކެވެ.

 ކުޑަކުދިންނަށް މި ބަލި ޖެހުމުގެ ފުރުސަތު ބޮޑުވި ނަމަވެސް، ހުރިހާ އުމުރެއްގެ މީހުންނަށްވެސް މި ބަލި ޖެހިދާނެއެވެ. ސިއްހީ މާހިރުން ފާހަގަކުރާ ގޮތުގައި، ބަލިޖެހިފައިވާ މީހަކާއެކު އުޅޭ މީހުންގެ ތެރެއިން 90 އިންސައްތަ މީހުންނަށް ބަލިޖެހުމުގެ ފުރުސަތު އޮވެއެވެ. ބަލި ފެތުރެނީ ބަލިޖެހިފައިވާ މީހާ ކެއްސައި ކިނބިހިއެޅުމުގެ ތެރޭގައި ވައިގެ ތެރެއަށް ބޭރުވާ ވައިރަސް، ނޭވާލުމުގެ ޒަރިއްޔާއިން އެހެން މީހުންގެ ހަށިގަނޑަށް ވާސިލުވުމުންނެވެ.

މި ބަލިން ރައްކާތެރިވުމަށް އޮތް އެންމެ ފަހި މަގަކީ ވެކްސިން ފުރިހަމަކުރުމެވެ. ރާއްޖޭގެ ގައުމީ ވެކްސިން ޕްރޮގްރާމްގެ ދަށުން ކުއްޖާގެ އުމުރުން 9 މަހުގައި އެމްއާރު (MR) ވެކްސިން ދެމުންދާއިރު، އެމްއެމްއާރު (MMR) ވެކްސިންވެސް ގަވާއިދުން ދެމުންދެއެވެ. މި ވެކްސިންތަކަކީ ހިމަބިހި އަދި ރުބެއްލާ ފަދަ ބަލިތަކުން ރައްކާތެރިކޮށްދޭ ވެކްސިންތަކެކެވެ.