އިންތިޚާބުތައް އެއްކޮށް ބޭއްވުމުން ދައުލަތުގެ ބާރުތަކުގެ ދެބަސްވުންތައް ކުޑަކުރެވޭނެ: ހުސެއިން ފަހުމީ
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމަކީ ދައުލަތުގެ ބާރުތަކުގެ މެދުގައި އުފެދޭ ސިޔާސީ ނުތަނަވަސްކަމާއި ދެބަސްވުންތައް ކުޑަކުރެވޭނެ ކަމެއް ކަމަށް ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕޮލިސީ އެންޑް މެނިފެސްޓޯ، އަލްއުސްތާޛު ހުސެއިން ފަހުމީ ވިދާޅުވެއްޖެއެވެ.
ހުސެއިން ފަހުމީ މިހެން ވިދާޅުވީ، ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އެއްދުވަހެއްގައި ބޭއްވުމަށް ސަރުކާރުން ނިންމާފައިވާ ނިންމެވުމާ ގުޅޭގޮތުން ވާހަކަފުޅު ދައްކަވަމުންނެވެ. ފަހުމީ ވިދާޅުވި ގޮތުގައި، އިންތިޚާބުތައް އެކީގައި ބޭއްވުމަކީ ހަމައެކަނި ޚަރަދު ކުޑަވާނެ ކަމެއް ނޫނެވެ. އޭގެ ބަދަލުގައި، އެއީ ޤައުމުގެ ސިޔާސީ ހަމަޖެހުމަށް މަގުފަހިވެގެންދާނެ މުހިންމު ފިޔަވަޅެކެވެ.
https://x.com/HussainFahmy09/status/2037622922484080690
ފަހުމީ އިތުރަށް ބަޔާންކުރެއްވި ގޮތުގައި، ޤައުމުގެ ތަރައްޤީއަށްޓަކައި ސިޔާސީ ހަމަޖެހުން އޮތުމަކީ ކޮންމެހެން މުހިންމު ކަމެކެވެ. ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމުން، ދައުލަތް ހިންގުމުގެ ބާރާއި ޤާނޫނު ހަދާ ބާރުގެ މެދުގައި އޮންނަ ގުޅުން އިތުރަށް ހަރުދަނާވެ، އެއް މިޞްރާބަކަށް މަސައްކަތް ކުރުމުގެ ފުރުޞަތު ބޮޑުވެގެންދާނެއެވެ. މީގެ ސަބަބުން ސިޔާސީ ވާދަވެރިކަމުގެ ތެރެއިން އުފެދޭ ހުރަސްތައް މަދުވެ، ސަރުކާރުން ރައްޔިތުންނަށް ވެވަޑައިގެންފައިވާ ވަޢުދުތައް ފުއްދުމަށް ބާރަކަށް ވާނެ ކަމަށްވެސް އޭނާ ފާހަގަކުރެއްވިއެވެ.
ފަހުމީ ވިދާޅުވީ، އިންތިޚާބުތައް އެކުލަވާލައި އެއްދުވަހެއްގައި ބޭއްވުމުގެ ނިޒާމަކީ ދިވެހިރާއްޖޭގެ ޑިމޮކްރަސީ ހަރުދަނާކޮށް، ސިޔާސީ މަސްރަޙު ފިނިކުރުމަށް އެޅޭނެ މުހިންމު ފިޔަވަޅެއް ކަމުގައެވެ.
ރިއެކްޝަންސް
