ދަރަނި ދައްކަން ޖެހުނަސް އެ ގާބިލްކަން އެބަހުރި: ރައީސް
ރާއްޖެއިން މިއަހަރު ދައްކަން ޖެހޭ ސުކޫކް، ވަގުތުން ވަގުތަށް ދައްކަން ޖެހުނު ކަމަށްވީ ނަމަވެސް އެކަން ކުރެވޭނެ މާލީ ގާބިލްކަން ދިވެހި ސަރުކާރުގައި އެބަހުރި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ މިއަދު ހެނދުނު ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ. ރާއްޖޭގެ އިގްތިސާދީ ހާލަތާއި ދަރަނި އަދާކުރުމުގެ ގާބިލްކަމާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ކުރިއަށް އޮތް އޭޕްރީލް 8 ވަނަ ދުވަހު ރާއްޖެއިން ސުކޫކަށް ދައްކަން ޖެހޭ ފައިސާ އެއްކޮށް ދައްކާ ހަލާސްކުރާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.
ރައީސް މުއިއްޒު އިތުރަށް ތަފްސީލު ދެއްވަމުން ވިދާޅުވީ، އެ ތާރީހުގައި ފައިސާ ދައްކަން ރައްކާކޮށްފައި 650 މިލިއަން ޑޮލަރު އެބަހުރި ކަމަށެވެ. އެހެންކަމުން 500 މިލިއަން ޑޮލަރުގެ ސުކޫކް ދައްކާ ހަލާސްކުރުމަށްފަހުވެސް، އިތުރު 150 މިލިއަން ޑޮލަރަށް ވުރެ ގިނަ ފައިސާ ބާކީ ހުންނާނެ ކަމަށް އެމަނިކުފާނު ފާހަގަކުރެއްވިއެވެ.
ކަންމިހެން އޮތްއިރު، އިތުރު ފައިސާ ހޯދުމުގެ ކާމިޔާބު މަސައްކަތްތަކެއް، ކަމާބަހާ ފަރާތްތަކާއެކު މަޝްވަރާކުރެވިގެން ކުރިއަށްގެންދެވޭ ކަމުގައި ރައީސުލްޖުމްހޫރިއްޔާ ވިދާޅުވިއެވެ. ނިމުމަކާ ހިސާބަށް މި މަޝްވަރާތައް ގޮސްފައިވާކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ ބޭރުގެ ދަރަނި ދެއްކެވުމުގައި ދިވެހިރާއްޖެއަށް އެއްވެސް ވަރެއްގެ ކަންބޮޑުވުމެއް ނެތްކަމުގައެވެ.
އެމަނިކުފާނުގެ ސަރުކާރުން ދިވެހިރާއްޖޭގެ އިޤްތިޞާދީ ކަންކަން މެނޭޖުކުރައްވަނީ ރާއްޖެއިން ބޭރަށް ދައްކަންޖެހޭ ދަރަނި ދެއްކޭނެ ގޮތައް ކަންކަން ކުރައްވަމުން، ރާއްޖޭގެ އެތެރޭގެ ފަރާތްތަކަށްވެސް ދޭން ހުރި ފައިސާއެއް ދައްކަވަމުން ކަމުގައި ރައީސުލްޖުމްހޫރިއްޔާ ވިދާޅުވިއެވެ. އެގޮތުން، ކުރިއަށް އޮތް ހަފުތާއަކީވެސް ރާއްޖޭގައި މަސައްކަތްކުރާ ކުދި ވިޔަފާރިތައް މެދުވެރިކޮށް ސަރުކާރުން ކުރުވާފައިވާ މަސައްކަތްތަކަށް، މަދުވެގެން 200 މިލިއަނެއްހާ ރުފިޔާ ދެވޭނެ ހަފުތާއެއްކަމުގައި ރައީސުލްޖުމްހޫރިއްޔާ ވިދާޅުވިއެވެ.
ބޭރު ފައިސާއާ ބެހޭ ޤާނޫނުގެ ދަށުން ފައިސާ މާރުކުރެވިފައިވާ ގޮތުގެ ތަފާސް ހިސާބުތައް ހިއްސާކުރައްވަމުން ރައީސުލްޖުމްހޫރިއްޔާ އިތުރަށް ވިދާޅުވީ، ދިވެހިރާއްޖޭގެ އިޤްތިޞާދީ ކަންކަން އޮތީ ވަރަށް ރަނގަޅަށް ކަމުގައެވެ. ހަމަމިއާއެކު، އެއްވެސް ވަރެއްގެ ކަންބޮޑުވުމެއް ނެތް ކަމަށާ، ދިވެހިރާއްޖޭގައި އޮތީ ވަރަށް ވަރުގަދަ، ބާރު ދުވެލީގައި ފުޅާވެ، ކުރިއަރަމުންދާ އިޤްތިޞާދެއް ކަމުގައިވެސް ރައީސުލްޖުމްހޫރިއްޔާގެ ވާހަކަފުޅުގައި ވަނީ ފާހަގަކުރައްވާފައެވެ.
ރިއެކްޝަންސް
