ތާރީޚީ ކާމިޔާބީއެއް: ދިއްދޫ ބިން ހިއްކުމުގެ މަޝްރޫޢު އެންމެ 50 ދުވަހުން ނިންމާލައިފި
ހއ. ދިއްދޫގެ ބިން ހިއްކުމުގެ ބޮޑު މަޝްރޫއުގެ އަމަލީ މަސައްކަތް އެންމެ 50 ދުވަހުގެ ތެރޭގައި އެއްކޮށް ނިންމާލައިފިއެވެ. މިއީ އެ ރަށުގެ ތަރައްގީގެ ތާރީޚުގައި ހާސިލުކުރެވުނު ވަރަށް ބޮޑު ކާމިޔާބީއެކެވެ.
މި މަޝްރޫއުގެ މަސައްކަތް ނިމުމާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ، ދިއްދޫގެ ބިން ހިއްކުމުގެ ބޮޑު މަޝްރޫއު ކާމިޔާބުކަމާއެކު ނިންމާލުމަކީ އެ ރަށުގެ ތަރައްގީގެ ދަތުރުގައި ހާސިލުކުރެވުނު މުހިންމު ލަނޑުދަނޑިއެއް ކަމަށެވެ.
މި މަޝްރޫއުގެ ތަފްސީލަށް ބަލާއިރު، އަމަލީ މަސައްކަތް ފެށުމަށްޓަކައި ބޭނުންވާ ޑްރެޖަރު ދިއްދޫއަށް ގެންގޮސްފައިވަނީ 3 ޖެނުއަރީ 2026 ގައެވެ. އަދި ބިން ހިއްކުމުގެ ރަސްމީ މަސައްކަތްތައް 4 ޖެނުއަރީ 2026 ގައި ފަށާފައިވާއިރު، މުޅި މަޝްރޫއު އެއްކޮށް ނިންމާލާފައިވަނީ 23 ފެބުރުވަރީ 2026 ގައެވެ.
މި މަޝްރޫއުގެ ދަށުން ދިއްދޫ ފަޅުން ޖުމްލަ 112 ހެކްޓަރުގެ ބިން ވަނީ ހިއްކާފައެވެ. މި މަސައްކަތަށްޓަކައި 5،492،089 ކިއުބިކް މީޓަރުގެ ވެލި ކޮނެގެން ބޭނުންކޮށްފައިވެއެވެ.
ދިއްދޫ ބިން ހިއްކުމުގެ މަޝްރޫއު ނިމުމާއެކު، އެ ރަށުގެ ރައްޔިތުންނަށް ދިމާވެފައިވާ ގެދޮރުވެރިކަމުގެ ދަތިތަކަށް ބޮޑު ހައްލެއް ލިބިގެންދާނެއެވެ. މީގެ އިތުރުން، ރަށުގެ އުމްރާނީ އަދި އިގްތިސާދީ ތަރައްގީގެ މަޝްރޫއުތަކަށް އާ ފުރުސަތުތަކެއް ހުޅުވި، މިއީ ރަށުގެ ދިގުމުއްދަތުގެ ކުރިއެރުމާއި ތަރައްގީއަށް ލިބިގެންދާނެ ވަރަށް ބޮޑު ބާރަކަށް ވެގެންދާނެއެވެ.
ރިއެކްޝަންސް
