މާލޭގެ ފެން ހިންދާ ނިޒާމު ހަރުދަނާކުރުމުގެ ބޮޑު މަޝްރޫއެއް ފެށުމަށް ތައްޔާރުވެއްޖެ
މާލެއަށް ދިމާވެފައިވާ ފެންބޮޑުވުމުގެ މައްސަލައަށް ދާއިމީ ހައްލެއް ހޯދުމަށްޓަކައި، ޒަމާންތަކަކަށްފަހު މާލޭގެ ފެން ހިންދާ ނިޒާމު ހަރުދަނާ ކުރުމުގެ އަމަލީ މަސައްކަތް ފެށުމަށް ސަރުކާރުން ތައްޔާރުވެއްޖެއެވެ.
މި މަޝްރޫއަކީ ޖަޕާނު ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމުގެ ދަށުން ކުރިއަށް ގެންދިއުމަށް ހަމަޖެހިފައިވާ މުހިންމު މަޝްރޫއެކެވެ. މި މަޝްރޫއު ކުރިއަށް ގެންދިއުމަށް ހަވާލުކޮށްފައިވަނީ ޖަޕާންގެ ޓެކް އިންޓަނޭޝަނަލް އިންކޯޕަރޭޝަނާއެވެ.
މި އެއްބަސްވުމުގެ ދަށުން މާލޭގައި މިހާރު ޤާއިމްކޮށްފައިވާ 16 ޕަންމްޕް ސްޓޭޝަން އޮޓޮމޭޓް ކުރުމަށްޓަކައި ބޭނުންވާ ޒަމާނީ އާލާތްތައް ހަރުކުރުމަށް ވަނީ ހަމަޖެހިފައެވެ. މީގެ އިތުރުން، މި ނިޒާމުތައް މޮނިޓަ ކުރުމަށްޓަކައި ސެންޓްރަލައިޒްޑް މޮނިޓަރިންގް ސްޓޭޝަނެއް ޤާއިމް ކުރުމާއި، ފެން ހިންދާ ނިޒާމު ބެލެހެއްޓުމަށް ބޭނުންވާ ޚާއްޞަ ޖެޓިންގެ ވެހިކަލެއްވެސް މި މަޝްރޫއުގެ ދަށުން ފޯރުކޮށްދޭނެއެވެ.
ރިއެކްޝަންސް
