ފްލެޓް ލިބޭ 3000 އަށްވުރެ މީހުންނާއެކު އެއްބަސްވުމުގައި ސޮއިކޮށްފި
ޑޮޕޮސިޓް ފައިސާ ދައްކަން އަންގަން ފަށައިފި
ފްލެޓް ލިބޭ 3000 އަށްވުރެ މީހުންނާއެކު އެއްބަސްވުމުގައި ފަހިދިރިއުޅުން ކޯޕަރޭޝަނުން ސޮއިކޮށްފި އެވެ.
ފަހިދިރިއުޅުން ކޯޕަރޭޝަނުން މިއަދު ޢާއްމުކުރި ހިސާބުތައް ދައްކާގޮތުން 3022 މީހުންނާއެކު ވަނީ އެއްބަސްވުމުގައި ސޮއިކޮށްފައެވެ. އަދި ސޮއިކުރުމަށް ތާވަލްކުރި މީހުންގެ އަދަދު 3088 އަށް އަރައެވެ. ތާޗަލްކޮށް ސޮއި ނުކުރެވި ވަނީ 56 މީހަކާ އެކުއެވެ.
ގެދޮރުވެރިޔާ ސްކީމްގެ ދަށުން އިމާރާތް ކުރީ 4000 ފްލެޓެވެ. ސޮއިކޮށް ނިމުމަކާ ހަމައަށްދާއިރު ފަހިދިރިއުޅުން ކޯޕަރޭޝަނުން މިހާރު ވަނީ ޑިޕޮސިޓް ދައްކަން އަންގަން ފަށާފައެވެ. ފްލެޓްތަކުގެ ތަޅުދަނޑި ހަވާލުކުރަނީ ކަނޑައަޅާފައިވާ ޑިޕޮސިޓް ދެއްކުމުންނެވެ. އެއީ 3 ކޮޓަރީގެ ފްލެޓަށް 25000 ރުފިޔާ އަދި 2 ކޮޓަރީގެ ފްލެޓަށް 15000 ރުފިޔާ އެވެ. މިމަހު ފްލެޓްތަކުގެ ތަޅުދަނޑި ހަވާލުކުރަން ފަށާނެ ކަމަށް އެޗްޑީސީން ވަނީ ވިދާޅުވެފައެވެ.
ފްލެޓްތަކުގައި މިހާރު ކުރަމުން ދަނީ ފިނިޝިންގެވެސް އެންމެ ފަހު މަސައްކަތްތަކެވެ. އެއްބަސްވުމުގައި ސޮއިކުރުމާއެކި އަސާސީ ޚިދުމަތްތައް ފްލެޓް ލިބޭ ފަރާތުގެ ނަމަށް ބަދަލުކުރުމުގެ ކަންކަން ސޮއިކުރާ ސަރަހައްދުން ހަމަޖެހެއެވެ. އެއިންތިޒާމްތައް އެޗްޑީސީން ވަނީ ހަމަޖައްސާފައެވެ.
ރިއެކްޝަންސް
