ކެރެލާގައި ބޮޑު އެކްސިޑެންޓެއް – ދިވެހި 3 އަންހެނެއްގެ ހާލު ދެރަ
މައުލޫމާތު ލިބިފައިވާ ގޮތުގައި އަނިޔާވި ތިން އަންހެނުންގެ ތެރެއިން އެކަކަށް މިހާރު ފަރުވާދެމުން އަންނަނީ އައިސީޔޫގަ
އިންޑިއާގެ ކެރެލާގައި ހިނގި ނުރައްކާތެރި އެކްސިޑެންޓެއްގައި ދިވެހި ތިން އަންހެނަކަށް ސީރިއަސް އަނިޔާތަކެއް ވެއްޖެއެވެ.
މި މީހުންނަށް ފަރުވާދެމުން އަންނަނީ ޓްރިވެންޑްރަމްގައި ހުންނަ ކިމްސް ހޮސްޕިޓަލުގައެވެ.
މައުލޫމާތު ލިބިފައިވާ ގޮތުގައި އަނިޔާވި ތިން އަންހެނުންގެ ތެރެއިން އެކަކަށް މިހާރު ފަރުވާދެމުން އަންނަނީ އައިސީޔޫގައެވެ. އޭނާ ހޭނާރާ ކަމަށް މީޑިއާ ރިޕޯޓުތައް ބުނެއެވެ.
އެނގިފައިވާ ގޮތުގައި މި އެކްސިޑެންޓުގައި އަނިޔާވެފައިވަނީ ރާއްޖޭގެ ރ.އަތޮޅުގެ ރަށަކަށް ނިސްބަތްވާ ތިން ކަނބަލުންނެވެ.
އެއީ 25 އަހަރުގެ މީހަކާއި 50 އަހަރުގެ މީހެއްގެ އިތުރުން 54 އަހަރުގެ މީހެކެވެ. އޭގެ ތެރެއިން އައިސީޔޫގައި ފަރުވާދެމުން އަންނަނީ 54 އަހަރުގެ އަންހެންމީހާއަށް ކަމަށް މައުލޫމާތު ލިބިފައިވެއެވެ.
މި އެކްސިޑެންޓު ހިނގާފައިވަނީ ކޮޗިންގެ ހޮސްޕިޓަލަކަށް ޑޮކްޓަރަށް ދެއްކުމަށްފަހު އެނބުރި ޓްރިވެންޑްރަމަށް ދަތުރުކުރަމުން ދަނިކޮށެވެ.
އިންޑިއާގެ ކެރެލާ ސްޓޭޓަކީ ދިވެހިން ބޭސްފަރުވާއަށް އެންމެ ގިނައިން ގޮސްއުޅޭ ސަރަހައްދެވެ. އޭގެ ތެރެއިންވެސް ޓްރިވެންޑްރަމް އާއި ކޮޗިން ފާހަގަ ކޮށްލެވެއެވެ.
ރިއެކްޝަންސް
