މިޒަމާނުގެ ތާރީޚްގައި އެންމެގިނަ ޔަތީމް ކުޑަކުދިންގެ ބިމަކަށް ޣައްޒާ! 39,000 ކުދިން ޔަތީމުވެފައި: ރިޕޯޓް
ޣައްޒާގައި މަންމަ ނޫނީ ބައްޕަ, ނުވަތަ މަންމަ އާއި ބައްޕަ އެކުގައި ނިޔާވެ 39,000 ށް ވުރެ ގިނަ ކުޑަކުދިން ޔަތީމްވެފައިވާކަމަށް ފަލަޞްޠީނުގެ ސްޓެޓިސްޓިކްސް އެޖެންސީގެ ރިޕޯޓް ބުނެފިއެވެ.
އިޒްރާއިލްއިން ޣައްޒާގައި ހަނގުރާމަ ފެށިފަހުން މިހާތަނަށް އެތައްހާސް ކުޑަކުދިންނެއްވަނީ އާއިލާތަކާއި މައިންބަފައިންނާ ވަކިވެފައެވެ. ބައެއް ކުދިން ދިތިތިބިކަން ނުވަތަ ނޫންކަން މައިންބަފައިންނަށް ނޭނގޭއިރު ބައެއް މައިން ނުވަތަ ބަފައިން ދުނިޔޭގައި ތިބިކަމެއް ނުވަތަ ނޫންކަމެއް އެކުދިންނަށްވެސް ނޭނގޭކަމަށް ރިޕޯޓްގައި ފާހަގަކޮށްފައިވެއެވެ.
މިދިޔަ ބުރާސްފަތި ދުވަހު ފަލަޞްޠީނިއަން ސެންޓްރަލް ބިއުރޯ އޮފް ސްޓެޓިސްޓިކްސް އިން ކުޑަކުދިންގެ ދުވަހާ ދިމާކޮށް ނެރުނު ރިޕޯޓްގައި ބުނެފައިވަނީ ޣައްޒާގައި ޔަތީމް ހާލުގައި 39,384 ކުދިން އެބަތިބި ކަމުގައެވެ. 536 ދުވަހުގެ ހަމަލާތަކުގައި މުޅި ޣައްޒާ ސުންނާފަތިވެފައިވާއިރު ޣައްޒާގެ އާބާދީގެ 2.3 މިލިއަން މީހުން ވަނީ ވިއްސިވިހާލިވެފައެވެ.
ބިއުރޯގެ ރިޕޯޓްގައި ވާގޮތުން އެކުދިންގެ ތެރެއިން 17,000 ކުދިންނަނީ ޔަތީމް މިސްކީނުންނެވެ. މާނައަކީ 17,000 ކުދިންގެ މަންމަ އާއި ބައްޕަ އެކުގައި އިޒްރާއިލްގެ ހަމަލާތަކުގައި ޝަހީދުކޮށްލާފައި ވާކަމެވެ.
"މި ކުދިންގެ ދިރިއުޅުމުގެ ހާލަތު އިންތިހާއަށް ދަތި. ވީދި ހަސްފަސްނެތިފައިވާ ޓެންޓްތަކުގައި ނުވަތަ ސުންނާފަތިކޮށްލާފައިވާ އިމާރާތްތަކުގައި ކުދިން އެބަ ދިރިއުޅޭ އެއްވެސް ފަރާތެއްގެ އެހީތެރިކަން ނެތި އެކަނި މާއެކަނި. އެކުދިންގެ މައިންބަފައިން ނެތުގެ ސަބަބުން ލިބުނު ނަފްސާނީ ތަކްލީފަށް ފަރުވާއެއް ލިބޭނެގޮތެއް އަމުދުން ނެތް. ޣައްޒާ މިދަނީ މިޒަމާނުގެ ތާރީޚްގައި ދެކުނު އެންމެ ބޮޑު ޔަތީމް ކާރިސާ ދެކެމުން" ރިޕޯޓާއެކު ބިއުރޯއިން ނެރުނު ބަޔާނުގައި ބުނެފައި ވެއެވެ.
ރިޕޯޓްގައި އިތުރަށް ފާހަގަކޮށްފައިވާގޮތުން އިޒްރާއިލްއިން 18 މަސް ދުވަހުގެ ތެރޭގައި ޣައްޒާގެ 17,954 ކުދިން ޝަހީދުކޮށްލާފައި ވެއެވެ. އޭގެ ތެރޭގައި 274 އަލަށް އުފަންވި ކުދިންނާއި އެއް އަހަރުން ދަށުގެ 876 ތުއްތު ކުއްޖަކުވެސް ހިމެނެއެވެ.
"ގަދަ ފިނީގައި ގަނޑުވެގެން 17 ކުއްޖަކުވެސް ވަނީ ނިޔާވެފަ. 52 ކުދިން އެކަށީގެންވާ ކާނާ ނުލިބުމުގެ ސަބަބުން ވަނީ ދުނިޔެ ދޫކޮށްފަ" އިތުރަށް ބަޔާނުގައި ބުނެފައި ވެއެވެ.
ރިޕޯޓްގައިވާގޮތުން އިޒްރާއިލްއިން މިހާރު ޣައްޒާއަށް އިންސާނީ އެހީ ވަނުން ހުއްޓުވާފައި ވުމާއިއެކު, ހަމައެކަނި އެކަށީގެންވާ ކާނާ ނުލިބުމުގެ ސަބަބަންވެސް 60,000 ކުދިން ބަނޑަށް މަރުވެދާނެ ކަމުގެ އިންޒާރުވަނީ ދީފައެވެ.
ބިއުރޯގެ ތަފާސްހިސާބުތައް ދައްކާގޮތުން ޣައްޒާއާއި ހިފާފައިވާ ހުޅަނގު އައްސޭރީގެ އާބާދީގެ 5.5 މިލިއަން ރައްޔިތުންގެ 43 އިންސައްތަ އަކީ 18 އަހަރު ނުފުރޭ ކުޑަކުދިންނެވެ.
ރިއެކްޝަންސް
