ޝަމްއާންގެ އާއިލާގެ މީހެއްގެ ފޯނު ހިފަހައްޓައި، ދެ މީހަކު ފުރުން މަނާކޮށްފި
ކޮރަޕްޝަންގެ ތުހުމަތުގައި މޯލްޑިވްސް އިމިގްރޭޝަންގެ ކޮންޓްރޯލާ ކަމުން ވަކިކުރެއްވި މުހައްމަދު ޝަމްއާން ވަހީދުގެ އާއިލީ މީހެއްގެ ފޯނު ހިފަހައްޓައި، ދެ މީހަކު ފުރުން މަނާކޮށްފިއެވެ.
ފުލުހުން ވިދާޅުވީ މި ފިޔަވަޅުތައް އަޅާފައިވަނީ އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީންގެ އަތުން ނާޖާއިޒު މަންފާ ހޯދި ކަމުގެ ތުހުމަތާ ގުޅިގެންނެވެ.
މި މައްސަލައިގައި ޝަމްއާން ވަނީ 15 ދުވަހަށް ބަންދުކޮށްފައެވެ. އަދި އިތުރު ތިން މީހަކުވެސް ހައްޔަރުކޮށް، އޭގެ ތެރެއިން ދެ މީހަކު 10 ދުވަހަށް އަދި އެކަކު ތިން ދުވަހަށް ބަންދުކޮށްފައިވެއެވެ.
ފުލުހުންގެ ތަހުގީގުން މިހާތަނަށް ހާމަވެފައިވާ ކަންކަމުގެ ތެރޭގައި، ބިދޭސީއަކު އަތުން 530،000 ރުފިޔާ ނަގައި، އޭނާ ދަންވަރު ވަގުތެއްގައި މިނިވަންކުރި ކަމަށް ތުހުމަތުކުރެވޭ ކަމަށް ފުލުހުން ވިދާޅުވިއެވެ.
މި މައްސަލައިގެ ތަހުގީގު ފުލުހުން ކުރިއަށްގެންދަވަކަމަށް ވިދާޅުވި އިރު، ފުރުން މަނާކުރި ދެ މީހުންގެ ތަފްސީލު އެއިދާރާއިން އަދި ހާމަކުރައްވާފައެއް ނުވެއެވެ.
ރިއެކްޝަންސް
