ޖަމާޢީ މަސައްކަތުން އުފާވެރިކަން ހޯދުމަށް ރައީސް ގޮވާލައްވައިފި
މިއަދަކީ ބައިނަލްއަޤްވާމީ އުފާވެރިކަމުގެ ދުވަސް
ޖަމާޢީ މަސައްކަތުން އުފާވެރިކަން ހޯދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.
އެމަނިކުފާނު މިފަދައިން ގޮވާލައްވާފައި ވަނީ ބައިނަލްއަޤްވާމީ އުފާވެރިކަމުގެ ދުވަހާ ގުޅިގެން ސޯސަލް މީޑިއާ އެކްސްގައި ކުރެއްވި ޕޯސްޓެއްގައެވެ.
އެމަނިކުފާނު ވިދާޅުވީ އުފާވެރިކަން ހޯދޭނީ ޖަމާޢަތުގެ ފެންވަރުގައި ކުރެވޭ މަސައްކަތުންކަމަށެވެ. ތަފާތުތަކާއެކުވެސް އެންމެން ގުޅިގެން އިންސާނިއްޔަތަށްޓަކައި މަސައްކަތްކުރުމުން ދެމިގެންދާ އުފާވެރިކަން ކަށަވަރުކުރެވޭނެ ކަމަށް އެމަނިކުފާނު ވިދާޅުވިއެވެ.
ދިވެހިންގެ އުފާވެރިކަމުގެ މިންގަނޑެއް އެކުލަވާލުމުގެ މަސައްކަތް ސަރުކާރުން ފަށާފައިވާއިރު، މި ދުވަސް ފާހަގަކުރުމަށް ސަރުކާރުގެ އެކި މުއައްސަސާތަކުން ޚާއްޞަ ޙަރަކާތްތަކެއް ރާވާފައިވާކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިން ވިދާޅުވިއެވެ. މީގެ ތެރޭގައި ގިފްޓް ޕެކް ޙަވާލުކުރުމާއި، މާ ހަދިޔާކުރުން ފަދަ ކަންކަން ހިމެނޭކަމަށް އެ ވުޒާރާއިން ވިދާޅުވިއެވެ.
ބައިނަލްއަޤްވާމީ އުފާވެރިކަމުގެ ދުވަސް ފާހަގަކުރަނީ ކޮންމެ އަހަރެއްގެ މާރިޗް މަހުގެ 20 ވަނަ ދުވަހުއެވެ.
ރިއެކްޝަންސް
