އަތޮޅުތަކުގެ ޞިއްޙީ ދާއިރާގެ ޢުމްރާނީ ތަރައްޤީއަށް 5.98 ބިލިއަން ރުފިޔާގެ މަޝްރޫޢު ކުރިއަށްދަނީ: މިނިސްޓަރ ގީލާ
އަތޮޅުތެރޭގެ ޞިއްޙީ މަރުކަޒުތަކާއި ހޮސްޕިޓަލްތަކުގެ ޢުމްރާނީ ތަރައްޤީއަށް މިހާތަނަށް 5.98 ބިލިއަން ރުފިޔާގެ މަޝްރޫޢުތައް ކުރިއަށްދާ ކަމަށް ސިއްހަތާއި އާއިލާއާއި އިޖްތިމާއީ އެހީއާ ބެހޭ ވަޒީރު ގީލާ އަލީ ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ވިދާޅުވީ، ރާއްޖޭގެ އެކި ކަންކޮޅުތަކަށް ފެންވަރު ރަނގަޅު ޞިއްޙީ ޚިދުމަތް ފުޅާކޮށް، ބޭސްފަރުވާއަށް ރައްޔިތުން އުފުލަންޖެހޭ ތަކުލީފުތަކަށް ދާއިމީ ހައްލެއް ހޯއްދަވައިދެއްވުމަށް ކުރައްވަމުންދާ މަސައްކަތްތަކުގެ ތެރެއިން، ޒަމާނީ ޞިއްޙީ ޚިދުމަތް ކަށަވަރުކޮށްދިނުމަށް ސަރުކާރުން ގިނަގުނަ ޢަމަލީ މަސައްކަތްތަކެއް ކުރަމުންދާކަމަށެވެ.
ވަޒީރު ހާމަކުރެއްވި ގޮތުގައި މި ސަރުކާރުން މިހާރުވެސް ވަނީ ރާއްޖޭގެ އެކި ސަރަޙައްދުތަކުގައި 40 އައު ހޮސްޕިޓަލެއްގެ މަޝްރޫޢުގެ ޢަމަލީ މަސައްކަތް ފަށާފައެވެ. މީގެއިތުރުން، މި ސަރުކާރުން 22 އައު ޞިއްޙީ މަރުކަޒެއްގެ މަސައްކަތް ފަށާފައިވާކަމަށެވެ.
އަދި މިހާރު ޚިދުމަތް ދެމުންދާ ޞިއްޙީ މަރުކަޒުތަކުގެ ޖާގަ އިތުރުކުރުމަށާއި ޚިދުމަތްތައް އަޕްގްރޭޑް ކުރުމަށްޓަކައި މި ސަރުކާރުން 89 މަޝްރޫޢެއް ފަށާފައިވާ ކަމަށްވެސް މިނިސްޓަރ ވިދާޅުވިއެވެ.
ރިއެކްޝަންސް
