ޖޭއެސްސީގެ ރައީސްގެ އާ މެމްބަރަކަށް ޔަޒްމީދު މުޙައްމަދު އައްޔަންކުރައްވައިފި
ޖުޑީޝަލް ސަރވިސް ކޮމިޝަންގެ ރައީސުލްޖުމްހޫރިއްޔާގެ އާ މެމްބަރަކަށް ގއ.ވިލިނގިލި، ޔަޒްމީދު މުޙައްމަދު، މިއަދު ޢައްޔަން ކުރައްވައިފިއެވެ.
ކޮމިޝަންގެ ރައީސުލްޖުމްހޫރިއްޔާގެ މެމްބަރަކަށް ޔަޒްމީދު އައްޔަން ކުރެއްވީ ކުރިން ހުންނެވި އަލްއުސްތާޛު މުޙައްމަދު ސަމީރު ވަކިކުރެއްވުމަށްފަހު އެވެ. ޖުޑީޝަލް ސަރވިސް ކޮމިޝަންގެ މެންބަރުކަމަށް ޢައްޔަން ކުރެއްވުމުގެ ކުރިން، ޖުޑީޝަލް ސަރވިސް ކޮމިޝަންގެ މެންބަރުކަމުގެ ހުވައި، ޔަޒްމީދު މުޙައްމަދު، ރައީސުލްޖުމްހޫރިއްޔާގެ ކުރިފުޅުމަތީގައި ކުރެއްވިއެވެ. ހުވައިލައިދެއްވީ، ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އޮނަރަބަލް ޑޮކްޓަރ މުޙައްމަދު އިބްރާހީމެވެ.
މި ރަސްމިއްޔާތުގައި ޖުޑީޝަލް ސަރވިސް ކޮމިޝަންގެ މެންބަރު ކަމަށް ޢައްޔަން ކުރެއްވި ކަމުގެ ލިޔުން، ރައީސުލްޖުމްހޫރިއްޔާ، އަލްފާޟިލް ޔަޒްމީދު މުޙައްމަދާ ވަނީ ޙަވާލުކުރައްވާފައެވެ.
ޖުޑީޝަލް ސަރވިސް ކޮމިޝަންގެ ރައީސްއަކީ ރައްޔިތުންގެ މަޖިލިހުގެ ގުރައިދޫ ދާއިރާގެ މެމްބަރު އަލްއުސްތާޛު ހުސެއިން ރިޒާއެވެ. ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުالله އަކީވެސް އެކޮމިޝަންގެ މެމްބަރެކެވެ. އެކޮމިޝަންގައި ސްޕްރީމް ކޯޓް ތަމްސީލްކުރައްވަނީ އަލްއުސްތާޛު ހުސުނުއްސުއޫދު އެވެ.
ރިއެކްޝަންސް
