ސަލްމާން މިސްކިތުންނާއި ބީއެމްއެލް ހުޅުމާލެ ބްރާންޗުން އުމްރާވެރިންނަށް ޑޮލަރު ވިއްކަން ފަށައިފި

ސަލްމާން މިސްކިތުންނާއި ބީއެމްއެލް ހުޅުމާލެ ބްރާންޗުން އުމްރާވެރިންނަށް ޑޮލަރު ވިއްކަން ފަށައިފިއެވެ. މިއީ މިރަމަޟާން މަހު އުމްރާ އަށް ދާ މީހުންނަށް ފަސޭހައިން ޑޮލަރު ގަތުމުގެ އިންތިޒާމް ހަމަޖައްސަން ބޭންކް އޮފް މޯލްޑިވްސް (ބީއެމްއެލް) އިން ހަމަޖެއްސެވި އިންތިޒާމެކެވެ.

އެއިންތިޒާމް ހަމަޖެއްސީ މާލޭގެ ދެސަރަހައްދަކުން ޑޮލަރު ލިބޭނެ ގޮތް ހަމަޖައްސައިގެންނެވެ. އެއީ ސަލްމާން މިސްކިތުގެ ކޮންފަރެންސް ހޯލުގަ އާއި، ބީއެމްއެލްގެ ހުޅުމާލެ ބްރާންޗުންނެވެ.  ބީއެމްއެލް އިން ބުނީ މިއަދުން ފެށިގެން ބޭންކު ބަންދު ނޫން ދުވަސްތަކުގައި،  މިމަހުގެ 27 ވަނަ ދުވަހުގެ ނިޔަލަށް ހެނދުނު 09:00 ން މެންދުރުފަހު 2:00 އަށް ހިދުމަތް ލިބޭނެ ކަމަށެވެ. އަދި މިއަންނަ މާރިޗު މަހުގެ 2 ވަނަ ދުވަހުން ފެށިގެން 13 ވަނަ ދުވަހުގެ ނިޔަލަށް ހެނދުނު 09:30 އާ 11:30 އާ ދެމެދު ހިދުމަތް ލިބޭނެ ކަމަށް ބީއެއްއެލްއިން ބުންޏެވެ.

 އުސޫލުގެ ދަށުން ކޮންމެ އުމްރާވެރިއަކަށްވެސް ވިއްކާނީ 500 ޑޮލަރު ކަމަށާ، އެއްފަހަރާ ގަނެވޭނީ 5 އުމްރާވެރިންގެ ޑޮލަރު ކަމަށް ބީއެމްއެލް އިން ވަނީ ކަނޑައަޅާފައެވެ. ހިދުމަތް ހޯދަން ދާއިރު، އުމްރާވެރިންގެ އައިޑީ ކާޑު ނުވަތަ ޕާސްޕޯޓު ގެންދިއުމަށާއި، ބަދަލުގައި އެހެން މީހަކުދާނަމަ އެމީހެއްގެ އައިޑީ ކާޑުވެސް ހިފައިގެން ދިއުމަށް ބީއެމްއެލް އިން ވަނީ އެދިފައެވެ.

ޑޮލަރު ގަތުމަށް ފައިސާ ދެއްކޭނީ ބީއެމްއެލްގެ ޑެބިޓު ކާޑުން ނުވަތަ ނަގުދު ފައިސާ އިންނެވެ. މިހިދުމަތް ލިބިގެންދާނީ އުމްރާ ގްރޫޕު ތަކުން ބީއެމްއެލް އަށް ހުށަހަޅާފައިވާ ލިސްޓުގައި ނަން ހިމެނޭ ފަރާތްތަކަށް އެކަނި ކަމަށް ބީއެމްއެލް އިން ބުންޏެވެ. ގުރޫޕެއް މެދުވެރިނުކޮށް އުމްރާއަށްދާ މީހުންނަށް، ޔޫއެސްޑީ ޕޯޓަލް މެދުވެރިކޮށް ޑޮަލަރުގެ މުއާމަލާތް ފުރިހަމަކުރުމަށްފަހު، ވެލާނާ އިންޓަރނޭޝަނަލް އެއަރޕޯޓުގެ ޑިޕާޗަރ ހޯލްއިން ޑޮލަރު ލިބޭނެ ކަމަށް ބީއެމްއެލް އިން ބުންޏެވެ.

Advertisement

Advertisement

ސަލްމާން މިސްކިތުންނާއި ބީއެމްއެލް ހުޅުމާލެ ބްރާންޗުން އުމްރާވެރިންނަށް ޑޮލަރު ވިއްކަމުންދާ ދުވަސްތަކުގައި ބީއެމްއެލް އިސްލާމިކް ބްރާންޗުންނާއި، މެއިން ބްރާންޗް އަދި ވިލިމާލެ ބްރާންޗުން އުމްރާވެރިންނަށް މިހިދުމަތް ނުލިބޭނެ ކަމަށް ބީއެމްއެލްއެިން ނެރުނު ބަޔާނުގައި ބުނެފައި ވެއެވެ. އެހެންނަމަވެސް، މާލެ ސަރަހައްދުން ބޭރުގައި ދިރިއުޅޭ އުމްރާވެރިންނަށް އެންމެ ކައިރީގައިވާ ބްރާންޗަކުން ހިދުމަތް ލިބޭނެ ކަމަށްވެސް ބީއެމްއެލް އިން ބުންޏެވެ.

 މި ރަމަޟާން މަހު އުމްރާވެރިންނަށް ޑޮލަރު ލިބުމުގައި ލުއި ފަސޭަ ގޮތް ހަމަޖައްސައިދިނުމުގެ ގޮތުން، ބީއެމްއެލްގެ ޑެބިޓު ކާޑުގެ ޑޮލަރު ލިމިޓު 1500 ޑޮލަރަށް ބީއެމްއެލްއިން  ވަނީ އިތުރުކޮށްފައެވެ. މިއީ ރައީސުލްޖުމްހޫރިއްޔާ ޑރ.މުޙައްމަދު މުއިއްޒުގެ އެދިވަޑައިގަތުމުގެ މަތީން ނިންމެވި ނިންމެވުމެކެވެ.