ހައްޖާއި އުމްރާއަށް ދާ ފަރާތްތަކުން ވެކްސިން ޖެހުމަށް އެޗްޕީއޭއިން އިލްތިމާސްކޮށްފި

ހައްޖާއި އުމްރާއަށް ދާ ދިވެހިން ވެކްސިން ޖެހުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފިއެވެ.

އެޗްޕީއޭއިން ބުނީ މިއީ އެތައް މިލިއަން މީހުން އެއްވާ ތަނަކުން ފެތުރިދާނެ ބަލިތަކުން ރައްކާތެރިވުމަށާއި، ރާއްޖެއަށް އެނބުރި އައުމުން ބަލި ފެތުރުން ހުއްޓުވުމަށް އަޅާ ފިޔަވަޅެއް ކަމަށެވެ.

އެޗްޕީއޭއިން ޖެހުމަށް އިލްތިމާސްކޮށްފައިވާ ވެކްސިންތަކަކީ މެނިންގޯކޯކަލް ކޮންޖުގޭޓް ވެކްސިން، އިންފްލުއެންޒާ ވެކްސިން، އަދި އޯރަލް ޕޯލިއޯ ވެކްސިންއެވެ.

މި ވެކްސިންތައް ފުރުމުގެ މަދުވެގެން 14 ދުވަސް ކުރިން ފުރިހަމަކުރުމަށް އެޗްޕީއޭއިން އަންގާފައިވެއެވެ. މި އެންގުމަކީ ހައްޖު އަދި އުމްރާ ގްރޫޕްތަކުގެ އިތުރުން އަމިއްލަ ގޮތުން ދަތުރުކުރާ ފަރާތްތަކަށްވެސް އެ އިދާރާއިން އަންގާފައިވާ އެންގުމެކެވެ.

އެޗްޕީއޭއިން ބުނެފައިވާ ގޮތުގައި، ވެކްސިން ޖެހުމުގެ މިންގަނޑުތައް ކަނޑައަޅަނީ އެވަގުތެއްގައި ބަލިތައް ފެތުރޭ މިންވަރަށާއި ރާއްޖޭގެ ހާލަތަށް ރިއާޔަތްކޮށްގެންނެވެ. އަދި މި މިންގަނޑުތަކަށް ގެނެވޭ ބަދަލުތައް އާންމުކޮށް އަންގާނެ ކަމަށްވެސް އެ އިދާރާއިން ބުނެފައިވެއެވެ.