މެޑިކަލް އިވެކިއުއޭޝަން ތަކަށް ރަފަޙް ބޯޑަރު ހުޅުވާލައިފި
ހަމާސް އާއި އިޒްރާއިލްއާ ދެމެދު ވެފައިވާ ހަމަލާތައް މެދުކަނޑާލުމާގުޅޭ އެއްބަސްވުމުގެ ދަށުން މާދަމާ ރަފަޙް ކޮރޮސިން ހުރަސްކޮށް ފަލަޞްޠީނުގެ 50 ރައްޔިތުން ޒަރޫރީ ސިއްޙީ ފަރުވާއަށް ޣައްޒާއިން ބޭރަށް ދާނެއެވެ. މިއީ ގިނަ މަސްތަކަކަށްފަހު ރަފަޙް ބޯޑަރު ހުޅުވާލި ފުރަތަމަ ފަހަރެވެ.
އެއްބަސްވުމާ އެއްގޮތަށް ކުރިއަށް އޮތް ދުވަސްތަކުގައިވެސް ސިއްޙީ ފަރުވާއަށް ދުވާލަކު ކަނޑައެޅޭ ވަކި އަދަދަކަށް މީހުން ޣައްޒާއިން ބޭރަށް ދިއުމުގެ ހުއްދަ ލިބޭނެއެވެ.
މިއަދު ރަފަޙް ބޯޑަރު ހުޅުވާލާފައިވާއިރު ޣައްޒާއަށް ބޭނުންވާ އިންސާނީ އެހީތެރިކަން ދިނުމަށް ގެންނަ ސާމާނާއެކު ޖެނުއަރީ 19 ވަނަ ދުވަހުން ފެށިގެން ކަރެމް އަބޫ ޝަލެމް ވަނީ ހުޅުވާލާފައެވެ. އެއްބަސްވުމާ އެއްގޮތަށް ދުވާލަކު 600 ޓްރަކްގެ އިންސާނީ އެހީގެ ތަކެތި ދަނީ ޣައްޒާއަށް އެތެރެވަމުންނެވެ.
ސިއްޙީ އެހީތެރިކަމަށް ބެނުންވާ ފަލަޞްޠީނުގެ މީހުންނާ ބޯޑަރުން ހަވާލުވާނީ ޔޫރަޕިއަން ޔޫނިއަން (އީޔޫ)އިން ނެވެ. އެޖަމާއަތުން ފަލަޞްޠީނުގެ ރައްޔިތުންނަށް ބޭނުންވާ ސިއްޙީ ފަރުވާގެ ކަންކަމަށް ޤައުމުން ބޭރަށް ދިއުމާ ގުޅެ ކަންކަން ހަމަޖައްސާނެއެވެ.
ޤަބޫލުކުރެވޭ ގޮތުގައި ދުވަސްތަކެއް ފަހުން ޣައްޒާއިން އެނބުރި މީހުން ނިކުތުމަށާއި ޢައްޒާއަށް އެނބުރި މީހުން އައުމަށް ރަފަޙް ބޯޑަރު އެއްބަސްވެވޭ ގޮތެއްގެ މަތިން ހުޅުވާލާނެއެވެ.
ރިއެކްޝަންސް
