އަންރްވާ: ޣައްޒާގެ 'ދިރިހުރުމުގެ ނާރު' މަނާކުރާ އިޒްރާއިލްގެ ޤާނޫނު ތަންފީޒުކުރަން ފަށައިފި
އިޒްރާއިލްއިން އދގެ އެޖެންސީ ފޯރ ޕަލަސްޠީނިއަން ރެފިއުޖީސް (އަންރްވާ) މަނާކުރުމުގެ ނިންމުން މިއަދުންފެށިގެން ތަންފީޒުކުރަން ފަށައިފިއެވެ. އަންރްވާ އަކީ ޣައްޒާ އަދި ހިޞާރުކޮށްފައިވާ ހުޅަނގު އައްސޭރީގެ ރައްޔިތުން ދިރިހުރުމާ ގުޅިފައިވާ އދ ގެ ޖަމާއަތެކެވެ.
އިޒްރާއިލްއިން އިޒްރާއިލްގެ ބިންތަކުގަ އާއި ހިޞާރުކޮށްފައިވާ ހުޅަނގު އައްސޭރީގެ އިރުމަތީ ގުދުސްގައި އަންރްވާ މަނާކުރާ ބިލް ފާސްކޮސްފައިވަނީ ފާއިތުވި އޮކްޓޯބަރު މަހުއެވެ. މި ބިލް މިއަދު ތަސްދީޤުކުރަން ފެށުމާއެކު އިޒްރާއިލްގެ އެއްވެސް އިދާރާއަކަށް އަންރްވާ އާ މުޢާމަލާތް ކުރުންވެސް މަނާވާނެއެވެ.
އަންރްވާ އިން ފާއިތުވެދިޔަ 70 އަހަރުގެ ތެރޭގައި އައީ މެދުއިރުމަތީގެ އެކި ޤައުމުތަކުގައި ދިރިއުޅޭ ފަލަޞްޠީނުގެ ރައްޔިތުންނަށް ބޭނުންވާ ދިރިހުރުމުގެ އަސާސީ ކަންކަން ފުރިހަމަކޮށްދިނުމުގައި އެހީތެރިކަން ފޯރުކޮށްދެމުންނެވެ. އެ މަސައްކަތުގައި ދެމިހުރުމުގެ އަގެއްގެ ގޮތުން އެ ޖަމާއަތާއި އިޒްރާއިލްއާ އެއްވެސް އިރެއްގައި އެހާ ގުޅުން ރަނގަޅެއްނޫނެވެ.
އިޒްރާއިލްއިން ވަނީ 7 އޮކްޓޯބަރ ގެ ހަމަލާގައި އަންރްވާގެ މުވައްޒަފުން ބައިވެރިވި ކަމަށް އެތައް ފަހަރެއްގެ މަތިން ތުހުމަތުކޮށްފައެވެ. ނަމަވެސް އެއްވެސް ފަހަރެއްގައި އެކަމަށް ބާރުދޭ އެއްވެސް ހެއްކެއް އިޒްރާއިލް އަށް ދެއްކިފައެއް ނުވެއެވެ.
އަންރްވާ މަނާކުރުން ތަންފީޒުކުރުމުގެ ކުރިން އިޒްރާއިލްގެ އަސްކަރިއްޔާގެ ތަރުޖަމާނު އޮރެން މާމޯސްޓެއިން ބުނެފައިވަނީ "އިންސާނީ އެހީ އާއި އަންރްވާ އެއްހަމަ ނުވާނެ" ކަމުގައެވެ. އަދި އަންރްވާގެ ބަދަލުގައި އެހެން ޖަމާއަތްތަކަށް ވެސް އެމަސައްކަތް ކުރެވޭނެ ކަމަށް އޭނާ ވަނީ ބުނެފައެވެ.
އަންރްވާ މަނާކުރުން ހުއްޓުވައިދިނުމަށް އިންސާނީ ހައްޤުތަކަށް މަސައްކަތްކުރާ ޖަމާއަތަކުން އިޒްރާއިލްގެ ހައިކޯޓަށް ހުށަހެޅި ޕެޓިޝަން ވަނީ ބަލައިނުގަނެ އަނބުރާ ފޮނުވާލާފައެވެ.
އިޒްރާއިލް އިން އަންރްވާ މަނާކުރުން ތަންފީޒު ކުރަންފެށުމާއެކު ޣައްޒާގެ ގިނަ ރައްޔިތުންތަކެއް ދަނީ ދެން އެމީހުންނަށް އެހީތެރިވާނެ ބަޔަކު ނެތުމުން އެކަމުގެ ކަންބޮޑުވުން ފާޅުކުރަމުންނެވެ.
"އަންރްވާ އަކީ އެތައް ޖީލުތަކަށް ދެމިގެންދިޔަ ޣައްޒާގެ ދިރިހުރުމުގެ ނާރު. ތައުލީމާއި, ސިއްހީ ޙިދުމަތާއި, ކާބޯތަކެތި އަދި ހަނގުރާމަ ނޫނީ ހަމަޖެހުމުގެ ވަގުތުގައި ވެސް އެމީހުން އަހަރެމެންނަށް އެހުރިހާ ކަމެއް ފޯރުކޮށްދެމުން އައީ" ޙާން ޔޫނުސްގައި ސުންނާފަތިވެފައިވާ ގޭގެ ކުރިމަތީގައި އިށިއިނދެގެން އިން 74 އަހަރުގެ އަބޫ ނައެލް ހަމުދާ އަލްޖަޒީރާ އަށް ބުންޏެވެ.
އޭނާ އިތުރަށް ބުނީ އަންރްވާ އަކީ ފަލަޞްޠީނުގެ ރެފިއުޖީންގެ ފުއްޕާމޭ ކަމަށާއި އެއާ ނުލާ އެމީހުންގެ ނޭވާތާށިވެދާނެ ކަމަށެވެ.
ރިއެކްޝަންސް
