ފަތުރުވެރިކަމާ ބެހޭ ވަޒީރުކަން ކުރުމަކީ ފަޚުރެއް, ރައީސްއަށް ޝުކުރުއަދާކުރަން- ފައިސަލް
ފަތުރުވެރިކަމާ ބެހޭ ވަޒީރުކަން ކުރެއްވުމަކީ ލިބިވަޑައިގެންނެވި ފަޚުރެއް ކަމަށާއި, އެފުރުޞަތު ދެއްވިކަމަށްޓަކައި ރައީސްޖުލްޖުމްހޫރިއްޔާ ޑރ.މުޙައްމަދު މުއިއްޒު އަށް ޝުކުރުއަދާކުރައްވާ ކަމަށް އިބްރާހީމް ފައިސަލް ވިދާޅުވެއްޖެއެވެ.
މިދިޔަ އަންގާރަ ދުވަހު ވަޒީރުކަމުން ވަކިކުރެއްވި ފައިސަލް މިއަދު ފޭސްބުކްގައި ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރު އުފެދި، އެ މަނިކުފާނުގެ ވަޒީރުންގެ މަޖިލީހުގައި ހިމަނުއްވައި މިނިސްޓަރ އޮފް ޓޫރިޒަމްގެ މަގާމުގައި ޚިދުމަތް ކުރާން ފުރުސަތު ދެއްވުމަކީ ލިބިވަޑައިގެންނެވި ނުހަނު މަތިވެރި އުފަލަކާއި ޝަރަފެއް ކަމަށެވެ. މަގާމުން ވަކި ކުރެއްވުމާ ހަމައަށް، ޓޫރިޒަމް މިނިސްޓަރު ކަމުގެ މަގާމުގައި ދިވެހި ގައުމަށާއި ދިވެހި ރައްޔިތުންނަށް ޚިދުމަތް ކުރާން ފުރުސަތު ދެއްވެވި ކަމީ އަބަދުވެސް ފަޚުރުވެރިވާނެ ކަމެއްކަމަށް ފައިސަލް ވިދާޅުވިއެވެ.
ފައިސަލް ވިދާޅުވީ ވޭތުވެ ދިޔަ ތަނުގައި، ހަވާލު ކުރެއްވި މަސައްކަތް އަދާ ކުރެއްވީ ޝައުގުވެރިކަމާއި އިޙްލާސްތެރި ކަމާއެކު ތެދުވެރިވެ ހުރެ ކަމަށެވެ.
" އަޅުގަނޑު ޤާބިލިއްޔަތު ތަންދިން އެންމެ އުސް ދަރަޖައިގައި ވަރުބަލި ނުވެ އެވެ. އަޅުގަނޑާ ހަވާލު ކުރެއްވި ޓޫރިޒަމްގެ އަމާޒުތަކަށް ވާސިލުވާން މަސައްކަތްކޮށްފައި ވާނީ ދިވެހިރައްޔިތުންނާއި ގާތުންނެވެ. ބަދަލުވަމުންދާ ދުނިޔޭގެ ފަތުވެރިކަމަށް ބަލައިގެނެވެ." ފައިސަލް ވިދާޅުވިއެވެ.
ބައެއް ކާމިޔާބީތައް ފާހަގަކުރައްވަމުން ފައިސަލް ވިދާޅުވީ ދިވެހި ސަރުކާރުން މިދިޔަ އަހަރަށް ކަނޑައެޅި މައިގަނޑު އަމާޒު ކަމަށްވާ 2 މިލިއަން ޓޫރިސްޓުންގެ ލަނޑު ދަނޑިއަށް ވާސިލު ވެވުނު ކަމަށެވެ. އެއީ ދިވެހިންގެ ހަޔާތުގައި ތާރީޚީ އުފަލަކާއި ބޮޑު ކާމިޔާބީއެއް ކަމަށާއު, އެ އުފާ ދިވެހި ސަރުކާރާއި ރައްޔިތުނަށް ހޯދައި ދޭން އުޅެވުނީ ޓޫރިޒަމް އިންޑިސްޓްރީގެ އަޑު އަހައިގެން ކަމަށް ވިދާޅުވިއެވެ. އޭގެއިތުރުން ދިވެހި ރައްޔިތުން ފަރާތުންގެ ލިބުނު ފާޑުކިޔުން ވެސް ބަލައިގަނެގެންކަމަށް ވިދާޅުވިއެވެ. ރައްޔިތުން ކީ ފާޑަކީ ކުރިޔަށް ވަޑައިގަތުމަށް ލިބުނު ގަދަ ހިތްވަރެއްކަމަށް ފައިސަލް ވިދާޅުވިއެވެ.
ފައިސަލް ވަނީ މަގާމްގެ ޒިންމާ އަދާކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ފަރާތްޕުޅުންނާއި އެ މަނިކުފާނުގެ ވަޒީރުންގެ މަޖިލީހާއި ޓޫރިޒަމް މިނިސްޓަރީގެ ސިޔާސީ މުވައްޒަފުންނާއި ސިވިލްސާވިސް މުވައްޒަފުންގެ ފަރާތުން ލިބިވަޑައިގެންނެވި އެއްބާރުލުން ފާހަގަކުރައްވާފައެވެ. އަދި ފަތުރުވެރިކަމުގެ ދާއިރާގެ ބޭފުޅުންގެ ފަރާތުން ލިބިވަޑައިގެންނެވި އެއްބާރުލެއްވުންވެސް ފާހަގަކުރެއްވިއެވެ.
ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުاللهގެ ދަރިކަލުން ފައިސަލް ވަޒީރުކަމުން ވަކިކުރެއްވީ ގުޅުން ގޯސްވެފައިވާ ކަމުގެ އަޑުތައް ގަދަވެފައި ވަނިކޮށެވެ. ނަމަވެސް ސަބަބެއް ވިދާޅެއް ނުވެއެވެ.
ރިއެކްޝަންސް
