ހަމަލާތައް މަދުކަނޑާލާފައިވަނިކޮށް އިޒްރާއިލްއިން ޣައްޒާގެ 5 އަހަރުގެ ކުޑަކުއްޖަކު ޝަހީދުކޮށްލައިފި
މިއީ އިޒްރާއިލްއިން އެއްބަސްވުމާ ޚިލާފްވި ފުރަތަމަ ފަހަރެއް ނޫން.
އިޒްރާއިލްގެ ހަމަލާއެއްގައި ދެ އަހަރުގެ ކުއްޖަކާއި އިތުރު މީހަކު ޝަހީދުކޮށްލާ ތިން މީހަކު ޒަޙަމްކޮށްލައިފިއެވެ. އެއްބަސްވުމެއްގެ ދަށުން ހަމަލާތައް ދެފަރާތުން މެދުކަނޑާލާފައި ވަނިކޮށް އިޒްރާއިލްގެ މި ހަމަލާ އަމާޒުކޮށްފައިވަނީ ގެދޮރު ދޫކޮށް ގޮސްފައިވާ އެތައްހާސް ބަޔަކު އަނބުރާ އުތުރު ޣައްޒާއަށް ދަތުރުކުރަމުން ދިޔަ ދަނޑިވަޅުގައެވެ.
އިޒްރާއިލްގެ މި ހަމަލާގައި ޝަހީދުވީ އުމުރުން އެންމެ ފަސް އަހަރުގެ ނާދިއާ މުޙައްމަދު އަލް-އަމޫދީ އެވެ. ވަފާ ނިއުސް އެޖެންސީން ރިޕޯޓްކޮށްފައިވާ ގޮތުގައި އެމީހުން ދަތުރު ކުރަމުން ދިޔަ އަސްގާޑިޔަލަށް އިޒްރާއިލްއިން ވަނީ ވައިގެ ހަމަލާއެއް އަމާޒުކޮށްފައެވެ. ނުސީރަތު ރެފިއުޖީ ކޭމްޕް ކައިރިން ދަތުރުކުރަމުން ދިޔަ އަސްގާޑިއަލަށް ދިން ހަމަލާގައި އިތުރު ތިން މީހަކު ޒަޙަމްވެފައިވާކަމަށް ވަފާ ނިއުސް އެޖެންސީން ރިޕޯޓްކޮށްފައި ވެއެވެ.
އަދި ނޫސިރަތު ރެފިއުޖީ ކޭމްޕް ކައިރީގައި ތާށިވެފައި އޮތް ބުލްޑޯޒަރެއް ދުރުކުރަން އުޅުނު ބައެއްގެ ތެރެއަށް ބޮމެއް ގޮއްވާލާ އެކަކު ޝަހީދުވެފައި ވާއިރު އެސަރަޙައްދުން ގިނަ ބަޔަކު ޒަޙަމްވެފައިވާ ކަމަށްވެސް ވަނީ ރިޕޯޓްކޮށްފައެވެ.
ހަމާތައްހުއްޓާލުމަށް ޖެނުއަރީ 19 ން ފެށިގެން އެއްބަސްވުމަކަށް އަމަލުކުރަމުން ދާ މި ދަނޑިވަޅުގައި އިޒްރާއިލްއިންވަނީ އެތައް ފަހަރެއްގެ މަތިން އެއްބަސްވުމާ ޚިލާފްވެފައެވެ. އާދިއްތަ ދުވަހު އުތުރު ޣައްޒާއަށް އަނބުރާ ދިއުމަށް ނެޓްޒަރިމް ކޮރިޑޯކައިރި އެއްވެފައި އޮތް އެތައްހާސް ފަލްޞްޠީނުގެ ރައްޔިތުންގެ ތެރެއަށް ބަޑިޖަހާ އެކަކު ޝަހީދުކޮށްލާފައިވާކަމަށް އަލްޖަޒީރާގައި ވެސް ރިޕޯޓްކޮށްފައި ވެއެވެ.
އިޒްރާއިލްގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ މެދުތެރޭ ޣައްޒާއިން ހަމަލާދިނީ "ހަމަލާއެއް ދީފާނެކަމަށް ޝައްކުކުރެވޭ އުޅަނދަކަށް" ކަމަށާއި އެސަރަހައްދުގައި އުތުރަށް ދުއްވުން "ހަމަލާތައް މެދުކަނޑާލުމާ ގުޅޭ އެއްބަސްވުމުގެ ދަށުން ހުއްދަނޫން" ކަމުގައެވެ. އަދި އުތުރު ޣައްޒާގައި އެމީހުނަންނަށް ނުރައްކަލަކަށް 'ވެދާނެ' ކަމަށް ބެލެވުނު މީހެއްގެ ގަޔަށް ބަޑިޖަހާފައި ވާނެކަމަށްވެސް އެ ބަޔާނުގައި ބުނެފައި ވެއެވެ.
ރިއެކްޝަންސް
