ފައިސަލްއާމެދު ފަޚުރުވެރިވަން- އަބްދުއްރަހީމް
ދަރިފުޅު އިބްރާހީމް ފައިޞަލަށްޓަކައި ފަޚުރުވެރިވެވަޑައިގަންނަވާ ކަމަށް ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ. އަބްދުއްރަހީމް މިފަދައިން ވިދާޅުވެ ޓްވީޓެއް ކުރެއްވީ މިއަދު ކުއްލި ގޮތަކަށް ފައިސަލް ވަޒީރުކަމުން ވަކިކުރެއްވުމާ ގުޅިގެންނެވެ. މިސަރުކާރުގެ ފުރަތަމަ ޓޫރިޒަމް މިނިސްޓަރ އިބްރާހީމް ފައިސަލް މަގާމުން ވަކިކުރެއްވި ކަމުގެ ސިޓީ އޭނާއަށް ލިބިވަޑައިގަތީ މިއަދު އޮފީހަށް ވަޑައިގެންނެވި ފަހުންނެވެ.
އަބްދުއްރަހީމް ވިދާޅުވީ އޭނާއާ އޭނާގެ ޢާއިލާވެސް ފައިސަލްއާމެދު ފަޚުރުވެރިވެވަޑައިގަންނަވާ ކަމަށެވެ. އަބްދުއްރަހީމް ވިދާޅުވީ ރާއްޖޭގެ ފަތުރުވެރިކަމާބެހޭ ވަޒީރުކަމުގެ މަގާމުގައި ހުންނަވައިގެން ފައިސަލް ޚިދުމަތް ކުރެއްވީ އިޚްލާޞްތެރިކަމާ ތެދުވެރިކަމާއެކު ކަމަށެވެ. ފައިސަލް ނަތީޖާނެރެދެއްކި ކަމަށް އަބްދުއްރަހީމް ވިދާޅުވިއެވެ. ފަތުރުވެރިކަމުގެ ދާއިރާގެ އިތުބާރާ ލޯބިވެސް ފައިސަލް ހޯއްދެވި ކަމަށް އަބްދުއްރަހީމް ވިދާޅުވިއެވެ.
" މާތް الله ދަރިފުޅު ފައިޞަލަށް ސާބިތުކަމާ ކެތްތެރިކަން މިންވަރުކުރައްވާ މާ އުޖާލާ މާދަމާއެއް ދައްކަވާށި. އާމީން" އަބްދުއްރަހީމް ވިދާޅުވިއެވެ.
ފައިސަލް ކުއްލި ގޮތަކަށް ވަޒީރުކަމުން ވަކިކުރައްވާފައި މިވަނީ އަބްދުއްރަހީމްއާއި ރައީސުލްޖުމްހޫރިއްޔާ ޑރ.މުޙައްމަދު މުއިއްޒުގެ ގުޅުން ގޯސްވެފައިވާކަމުގެ އަޑުތައްވެސް ގަދަވެފައި ވަނިކޮށެވެ.
ރިއެކްޝަންސް
