'ޣައްޒާގެ ނަޞްރު' ފާހަގަކުރަން އެއްވުމެއް ބާއްވައިފި
ޤުދުސް އާއި ފަލަޞްޘީނުގެ ޙައްޤުގައި މަސައްކަތްކުރާ ދިވެހިރާއްޖޭގެ ޤައުމީ އިއްތިހާދުގެ ފަރާތުން ޣައްޒާއަށް ލިބުނު ނަޞްރު ފާހަގަކުރުމަށް އެއްވުނެއް ބާއްވައިފިއެވެ. މި އެއްވުން އޮތީ މިއަދު ހަވީރު އާޓިފިޝަލް ބީޗުގައެވެ.
އެއްވުމުގައި އެ އިއްތިޙާދު އަދި އިސްރާ އެސޯސިއޭޝަނުގެ ފަރާތުން ބޭފުޅުން ވަނީ ޣައްޒާގެ މުޖާހިދުނަނަށް އަދި ޣައްޒާއަށް ލިބުނު ނަޞްރާ ގުޅޭގޮތުން ވާހަކަ ދައްކާފައެވެ. 467 ދުވަސްވަންދެން އިޒްރާއިލްއިން ޣައްޒާގައި ހިންގަމުން ގެންދިޔަ ނަސްލު ނައްތާލުމުގެ ޤަތުލް އާންމު މެދުކަނޑާލުމަށް އެއްބަސްވެފައިވަނީ މި ހިނގާ ޖެނުއަރީ މަހުގެ 19 ވަނަ ދުވަހުއެވެ. އެއްބަސްވުމުގައި ވާގޮތުން, އެއްބަސްވުމުގެ ފުރަތަމަ ފިޔަވަހި 42 ދުވަހަށް ދެމިގެންދާނެއެވެ. އެމުއްދަތުގެ ތެރޭގައި ޣައްޒާއަށް އިންސާނީ އެހީގެ ތަކެއްޗާއެކު ދުވާލަކު 600 ޓްރަކް ވަންނާނެއެވެ. އަދި ހަމާސްގެ އަތްދަށުގައ ތިބި ރަހީނުގެ ތެރެއިން 33 މީހަކު ދޫކޮށްލުމަށް ހަމަޖެހިފައި ވެއެވެ. ބަދަލުގައި އިޒްރާއިލްގެ ޖަލުތަކުގައި ތިބި ފަލަޞްޠީނުގެ ދެހާހެއްހާ އަސީރުން މިނިވަން ކުރާނެއެވެ.
އެއްވުމުގައި އެ އިއްތިހާދުގެ ފަރާތުން ދެއްކެވި ވާހަކައިގައި ޣައްޒާއަށް ލިބުނު ނަޞްރުގެ ފަހަތުގައިވަނީ އެމީހުންގެ އީމާންތެރިކަމާއި, ހިތްވަރާއި ކެތްތެރިކަން އަދި އުޙުއްވަތްތެރިކަމާއި, ނުގުޑާފަދަ އަޒުމް ކަމުގައި ވަނީ ބުނެފައެވެ. އަދި އެއީ އެމީހުންގެ ހުރިހާކަމެއް الله ޞުބްޙާނަހޫ ވަތަޢާލާ އާ ހަވާލުކޮށްގެން, އެކަލާންގެ އަށް ވަކީލުކޮށްގެން ތިބިކަމުގެ ފުރިހަމަ ނަމޫނާ ކަމަށާއި ޣައްޒާގެ ރައްޔިތުންނަކީ އުއްމަތަށް ނަމޫނާއެއްކަމުގައި ވަނީ ފާހަގަކޮށްފައެވެ.
އެބޭފުޅުން ވިދާޅުވީ ސަޙްޔޫނީ ބައިގަނޑުގެ ލައްކައަކަށްވުރެ ގިނަ ސިފައިންނަށް އެންމެ 35,000 މުޖާހިދުން ބަލިނުކުރެވުނި ކަމަށާއި, އެންމެ ޒަމާނީ މޮޅު ހަތިޔާރާއެކުވެސް އެމީހުންނަށް ހަމާސް ފޮހެނުލެވުނު ކަމުގައެވެ. އަދި ހަމަލާތައް ހުއްޓާލުމަށް އެއްބަސްވީ ސަޙްޔޫނީންނަށް އެހެން އެއްވެސް ގޮތެއް ނެތިގެން ކަމަށެވެ.
15 މަސް ދުވަހަށްވުރެ ގިނަ ދުވަހަށް ދެމިގެންދިޔަ ހަމަލާތަކުގައި ޣައްޒާގެ ބައިލައްކައެއްހާ މީހުންވަނީ ޝަހީދުވެފައެވެ. އޭގެ ތެރޭގައި 17,000 ށްވުރެ ގިނަ ކުޑަކުދިން ހިމެނޭއިރު އިސްލާމީ އުއްމަތަށްޓަކައި ޖާނާއި މާލުން ހޭދަކުރި މުޖާހިންގެ ލީޑަރުންވެސް ވަނީ އަވަހާރަވެފައެވެ. މުޅި ޣައްޒާގެ 80 އިންސައްތް ބިމާހަމަބެފައިވާއިރު ސްކޫލްތަކާއި ހޮސްޕިޓަލްތައްވެސް ވަނީ އެއްކޮށް ހިދުމަތް ހުއްޓިފައެވެ.
ނަމަވެސް އެބޭފުޅުން ވިދާޅުވީ ހަނގުރާމައިގައި ލިބޭ ނަޞްރަކީ ލަޝްކަރުގެ އަދަދުގެ ގިނަކަމާއި, ހަތިޔާރުގެ މޮޅުކަމަށް ބިނާވެފައި އޮންނަ ކަމެއް ނޫންކަމަށާއި, ނަޞްރު ލިބޭނީ އީމާންތެރިކަމާއި ކެތްތެރިކަމުގެ މައްޗަށް ކަމުގައެވެ. އަދި ހަނގުރާމައިގައި ޣައްޒާ ފަނާވެގެން ދިޔަ ނަމަވެސް މި ހަނގުރާމައިން އެތައް އިބްރަތެއް ހާސިލްވެފައިވާ ކަމަށެވެ. މަދު އަދަދެއްގެ މުޖާހިދުން ނަމަވެސް ބިޔަ ލަޝްކަރުގެ ކުރިމަތީގައި މުސްލިމުން ކުޑަކަޚު ނުޖަހާނެ ކަމެވެ. އަދި މުޅި އުއްމަތުގެ ޝަރަފެއްކަމުގައިވާ މުސްލިމުންގެ ތިންވަނަ ހަރަމްފުޅު; މަސްޖިދް އަލް-އަޤްޞާގެ ދިފާއުގައި ފަލަޞްޠީނުގެ ރައްޔިތުން އެކުރަނީ އާދަޔާޚިލާފް ޖިހާދެއްކަންވެސް ވަނީ ފާހަގަކޮށްފައެވެ.
ރިއެކްޝަންސް
